കൊല്ലം: കാഥിക സാമ്രാട്ട് വി.സാംബശിവന്റെ നവതി ആഘോഷങ്ങളുടെ രണ്ടാംഘട്ടം ഇന്നുമുതൽ 17വരെ കൊല്ലത്ത് നടക്കും. ചിന്നക്കട സാംബശിവൻ സ്ക്വയറിൽ വി.സാംബശിവൻ ഫൗണ്ടേഷനും സാംസ്കാരിക വകുപ്പും ചേർന്നൊരുക്കുന്ന കഥാപ്രസംഗ മേളയം സാദരസന്ധ്യയുമാണ് അരങ്ങേറുക.
കഥാപ്രസംഗം മേളയുടെ ഉദ്ഘാടനം ഇന്ന് വൈകുന്നേരം ആറിന് മേയർ വി.രാജേന്ദ്രബാബു ഉദ്ഘാടനം ചെയ്യും. എൻ.രതിന്ദ്രൻ അധ്യക്ഷത വഹിക്കും. വൈകുന്നേരം നാലിന് കൊല്ലം കാർത്തിക് യയാതി എന്ന കഥപറയും. രാത്രി ഏഴിന് ഡോ.വസന്തകുമാർ സാംബശിവൻ പുതിയ കഥയായ മാതംഗി അവതരിപ്പിക്കും. പ്രസ്തുത കഥയുടെ ഉദ്ഘാടനവും മേയർ നിർവഹിക്കും.
നാളെ വൈകുന്നേരം നാലിന് എ.ആർ.ചന്ദ്രൻ വിളക്കിന് മാത്രമോ ചുവപ്പ് എന്ന കഥപറയും. ആറിന് മുതിർന്ന കാഥികരെ ആദരിക്കുന്ന സമാദര സന്ധ്യ നടക്കും. എം.നൗഷാദ് എംഎൽഎ ചടങ്ങിൽ മുഖ്യാതിഥിയായി പങ്കെടുക്കും. രാത്രി ഏഴിന് തൊടിയൂർ വസന്തകുമാരി മോണ്ടി ക്രിസ്റ്റോ എന്ന കഥ അവതരിപ്പിക്കും.
17ന് വൈകുന്നേരം നാലിന് വെണ്മണി രാജു ശ്രീ ചിത്തിര തിരുനാൾ എന്ന കഥാപ്രസംഗം അവതരിപ്പിക്കും. ആറിന് നടക്കുന്ന സമാപന സമ്മേളനം കവി ചവറ കെ.എസ്.പിള്ള ഉദ്ഘാടനം ചെയ്യും. രാത്രി ഏഴിന് കണ്ണൻ ജി.നാഥ് ആദ്യത്തെ കൺമണി എന്ന കഥാപ്രസംഗം അവതരിപ്പിക്കും.
സാംബശിവൻ നവതിയാഘോഷം: കഥാപ്രസംഗമേള ഇന്നുമുതൽ
11:33 PM Nov 14, 2018 | Deepika.com