വാഷിംഗ്ടൺ ഡിസി: പ്രസിഡന്റ് ജോ ബൈഡന്റെ വിശ്വസ്തനും ലോസ് ആഞ്ചലസ് നഗരത്തിലെ മുൻ മേയറുമായ എറിഗ് ഗാർസെറ്റി അമേരിക്കയുടെ ഇന്ത്യയിലെ അംബാസഡറായി നിയമിതനായി.
2021ലാണ് ബൈഡൻ ഇദ്ദേഹത്തെ നാമനിർദേശം ചെയ്തതെങ്കിലും ബുധനാഴ്ചയാണ് സെനറ്റ് നിയമനം അംഗീകരിച്ചത്. മേയറായിരുന്ന സമയത്ത് വിശ്വസ്തനായ ഒരു ജീവനക്കാരനുനേരെ ഉയർന്ന ലൈംഗികാരോപണം ഗാർസെറ്റി അവഗണിച്ചതായി റിപ്പോർട്ട് വന്നതാണ് നിയമനം വൈകിച്ചത്.
ഇന്ത്യ-അമേരിക്ക ബന്ധം വളരെ ഊഷ്മളമാണെങ്കിലും അമേരിക്കയ്ക്ക് 2021 ജനുവരി മുതൽ ഇന്ത്യയിൽ അംബാസഡറില്ല. ചൈനയെ തടയുന്നതിന് ഇന്ത്യയോട് കൂടുതൽ അടുക്കണമെന്ന നിലപാടുകാരനാണ് യുഎസ് പ്രസിഡന്റ് ബൈഡൻ.
യുക്രെയ്ൻ യുദ്ധത്തിന്റെ പേരിൽ റഷ്യയെ തള്ളിപ്പറയാത്ത ഇന്ത്യൻ നിലപാടിലും ബൈഡന് അതൃപ്തിയുണ്ട്. ഈ സാഹചര്യങ്ങളിലാണ് ബൈഡന്റെ വിശ്വസ്തൻ ഇന്ത്യയിലെ സ്ഥാനപതിയാകുന്നത്.
2013ൽ ലോസ് ആഞ്ചലസ് നഗരമേയറാകുന്ന ആദ്യ യഹൂദവംശജൻ കൂടിയായ ഗാർസെറ്റി, മുന്പ് നാവികസേനാ ഉദ്യോഗസ്ഥനായിരുന്നു.
എറിക് ഗാർസെറ്റി യുഎസ് അംബാസഡർ
02:32 AM Mar 17, 2023 | Deepika.com