വാഷിംഗ്ടൺ ഡിസി: കരിങ്കടലിനു മുകളിൽ അമേരിക്കയുടെ ആളില്ലാ ചാരവിമാനത്തെ റഷ്യൻ യുദ്ധവിമാനം തടയുന്നതിന്റെ വീഡിയോ പുറത്തുവന്നു.
അമേരിക്കൻ വ്യോമസേനയുടെ എംക്യു-9 റീപ്പർ ഡ്രോണിന്റെ പിൻഭാഗത്തിനു നേർക്ക് റഷ്യയുടെ സുഖോയ്-27 യുദ്ധവിമാനം രണ്ടു പ്രാവശ്യം വരുന്നതും ഇന്ധനം ചൊരിയുന്നതും വീഡിയോയിൽ കാണാം. തുടർന്ന് ഡ്രോണിന്റെ പ്രൊപ്പല്ലറുകളിലൊന്നിനു തകരാറുണ്ടായെന്നും വീഡിയോ പരിശോധിച്ച വിദഗ്ധർ ചൂണ്ടിക്കാട്ടി.
അമേരിക്കൻ സേനയുടെ യൂറോപ്യൻ കമാൻഡ് ആണ് വീഡിയോ പുറത്തുവിട്ടത്.
ചൊവ്വാഴ്ച രാവിലെയായിരുന്നു സംഭവം.
അന്താരാഷ്ട്ര വ്യോമമേഖലയിൽ നിരീക്ഷണം നടത്തുകയായിരുന്ന ഡ്രോണിൽ റഷ്യൻ യുദ്ധവിമാനം ഇടിച്ചുവെന്നും പറക്കാനുള്ള ശേഷി നഷ്ടപ്പെട്ട ഡ്രോണിനെ കടലിൽ വീഴ്ത്തിയെന്നുമാണ് അമേരിക്ക പറഞ്ഞത്. മേഖലയിൽ ഇനിയും വിമാനങ്ങൾ പറത്തുമെന്നും വ്യക്തമാക്കിയിട്ടുണ്ട്.
റഷ്യൻ യുദ്ധവിമാനം അമേരിക്കൻ ഡ്രോണിനെ തടയുന്ന വീഡിയോ പുറത്ത്
12:13 AM Mar 17, 2023 | Deepika.com