അൾജിയേഴ്സ്: അൾജീരിയയുടെ മുൻ പ്രസിഡന്റ് അബ്ദെല്ലസീസ് ബൂട്ട്ഫ്ളിക്ക (84) അന്തരിച്ചു. രണ്ടു പതിറ്റാണ്ടിലേറെ രാജ്യത്തെ നയിച്ച ബൂട്ട്ഫ്ളിക്ക 2019ൽ ജനകീയ പ്രക്ഷോഭത്തെത്തുടർന്നാണു സ്ഥാനമൊഴിഞ്ഞത്. 1950കളിലും അറുപതുകളിലും നടന്ന അൾജീരിയൻ സ്വാതന്ത്ര്യസമരത്തിൽ ബൂട്ട്ഫ്ളിക്ക പങ്കുവഹിച്ചിട്ടുണ്ട്.
1962ൽ ഫ്രാൻസിൽനിന്ന് അൾജീരിയ സ്വാതന്ത്ര്യം നേടിയപ്പോൾ 25-ാം വയസിൽ ബൂട്ട്ഫ്ളിക്ക വിദേശകാര്യമന്ത്രിയായി. പ്രായംകുറഞ്ഞ വിദേശകാര്യമന്ത്രിയെന്ന റിക്കാർഡ് ഇതുവരെ തിരുത്തപ്പെട്ടിട്ടില്ല.
1999ൽ രണ്ടു ലക്ഷത്തിലധികം പേർ കൊല്ലപ്പെട്ട ആഭ്യന്തരയുദ്ധത്തിനു പിന്നാലെയാണ് ബൂട്ട്ഫ്ളിക്ക പ്രസിഡന്റ് പദത്തിലെത്തുന്നത്.
2013ൽ പക്ഷാഘാതം വന്നുകിടപ്പിലായശേഷം വിരളമായേ അദ്ദേഹം പൊതുവേദികളിൽ പ്രത്യക്ഷപ്പെട്ടിരുന്നുള്ളൂ.
അൾജീരിയ മുൻ പ്രസിഡന്റ് ബൂട്ട്ഫ്ളിക്ക അന്തരിച്ചു
11:03 PM Sep 18, 2021 | Deepika.com