വാഷിംഗ്ടൺ ഡിസി: ഇറാൻ തീകൊണ്ടു കളിക്കുകയാണെന്ന് യുഎസ് പ്രസിഡന്റ് ട്രംപ്. നിർദിഷ്ട പരിധിയിൽ കൂടുതൽ സന്പുഷ്ട യുറേനിയം ശേഖരിച്ചെന്ന ഇറാന്റെ അറിയിപ്പിന്റെ പശ്ചാത്തലത്തിലാണ് ട്രംപ് ഇക്കാര്യം പറഞ്ഞത്.
ഇറാനു പ്രത്യേക സന്ദേശമൊന്നും നൽകുന്നില്ലെന്നും എന്താണു ചെയ്യുന്നതെന്ന് അവർക്ക് ഉത്തമബോധ്യമുണ്ടെന്നും ട്രംപ് വൈറ്റ്ഹൗസിൽ റിപ്പോർട്ടർമാരോടു പറഞ്ഞു. അവർ തീകൊണ്ടു കളിക്കുകയാണെന്നു ട്രംപ് ആരോപിച്ചു. ഇറാൻ ഭരണകൂടം ആണവമോഹം ഉപേക്ഷിക്കണമെന്ന് പ്രസ് സെക്രട്ടറി സ്റ്റെഫാനി ഗ്രിഷാം പ്രസ്താവനയിൽ നിർദേശിച്ചു.
2015ലെ കരാർ പ്രകാരം 300 കിലോഗ്രാംവരെ സന്പുഷ്ട യുറേനിയം കൈവശം വയ്ക്കാൻ ഇറാന് അനുമതിയുണ്ട്. ഈ പരിധി കവിഞ്ഞെന്നു കഴിഞ്ഞ ദിവസം ഇറാൻ പ്രഖ്യാപിച്ചു.
യുഎസ് കരാറിൽനിന്നു പിന്മാറി ഇറാനെതിരേ ഉപരോധം ഏർപ്പെടുത്തിയ സാഹചര്യത്തിലാണു പരിധി മറികടക്കാൻ തീരുമാനിച്ചതെന്ന് ഇറാൻ അധികൃതർ വ്യക്തമാക്കി.
ഇറാൻ തീകൊണ്ടു കളിക്കുന്നു: ട്രംപ്
12:33 AM Jul 03, 2019 | Deepika.com