ന്യൂഡൽഹി: കയറ്റുമതിയിൽ നാമമാത്ര വർധന, ഇറക്കുമതിയിൽ ചെറിയ കുറവ്, തത്ഫലമായി വാണിജ്യകമ്മി അല്പം കുറഞ്ഞു. ഡിസംബറിലെ ഇന്ത്യയുടെ വാണിജ്യനില ഇങ്ങനെ.
ക്രൂഡ്ഓയിൽ വിലയിടിവാണ് കമ്മി കുറയ്ക്കാൻ സഹായിച്ചത്. ക്രൂഡ് ഇറക്കുമതിച്ചെലവ് നവംബറിലെ 1348 കോടി ഡോളറിൽനിന്ന് ഡിസംബറിൽ 1067 കോടി ഡോളറായി താണു. തലേഡിസംബറിലേക്കാൾ 3.16 ശതമാനം കൂടുതലാണിത്.
കയറ്റുമതി 0.34 ശതമാനം മാത്രമേ വർധിച്ചുള്ളൂ. മൊത്തം കയറ്റുമതി 2793 കോടി ഡോളർ. എൻജിനിയറിംഗ്, ആഭരണങ്ങൾ, രത്നങ്ങൾ എന്നിവയിലാണ് തിരിച്ചടി നേരിട്ടത്. ഇറക്കുമതി 2.44 ശതമാനം താണ് 4100 കോടി ഡോളറായി. കമ്മി തലേ ഡിസംബറിലെ 1420 കോടി ഡോളറിൽനിന്ന് 1300 കോടി ഡോളറായി താണു.
ഏപ്രിൽ-ഡിസംബറിൽ കയറ്റുമതി 10.18 ശതമാനവും ഇറക്കുമതി 12.61 ശതമാനവും വർധിച്ചു.
വാണിജ്യകമ്മി അല്പം കുറഞ്ഞു
10:55 PM Jan 15, 2019 | Deepika.com