ന്യൂയോർക്ക്: ഒരു ദിവസം ആമസോൺ പൂട്ടും; കന്പനി പാപ്പരാകും. പറയുന്നതു മറ്റാരുമല്ല, ജെഫ് ബെസോസ് തന്നെ. ഇ കൊമേഴ്സിലെ ആഗോള ഒന്നാം നന്പറായ ആമസോണിന്റെ സ്ഥാപകനും ചെയർമാനും ചീഫ് എക്സിക്യൂട്ടീവ് ഓഫീസറുമായ ജെഫ് ബെസോസ്.
കന്പനിയിലെ ജീവനക്കാരുമായുള്ള ഒരു മീറ്റിംഗിലായിരുന്നു ഈ പ്രസ്താവന. സിയേഴ്സ് എന്ന റീട്ടെയിൽ ശൃംഖല ഈയിടെ പാപ്പർ ഹർജി നൽകിയിരുന്നു. ഏതാനും ദശകം മുന്പ് ലോകത്തെ ഏറ്റവും വലിയ ചില്ലറവ്യാപാര ശൃംഖലയായിരുന്നു സിയേഴ്സ്.
ഒരുലക്ഷം കോടി ഡോളറിനടുത്ത് വിപണിമൂല്യമുള്ള ആമസോണിന്റെ സ്ഥാപകൻ ഇതേപ്പറ്റി പറഞ്ഞത് ഇതാണ്: “ആമസോണും തകരാൻവയ്യാത്തത്ര വലുതല്ല. ഞാൻ പറയുന്നു, ഒരുനാൾ ആമസോൺ പരാജയപ്പെടും. ആമസോൺ പാപ്പരാകും. വലിയ കന്പനികളെ നോക്കുക. മുപ്പതുവർഷത്തിൽ അല്പം കൂടുതലേ അവയ്ക്ക് ആയുസുള്ളൂ. നൂറുകണക്കിനു വർഷങ്ങൾ ഇല്ല.’’
തകർച്ച ഒഴിവാക്കാൻ കന്പനി ചെയ്യേണ്ട കാര്യവും ബെസോസ് പറഞ്ഞു: ഉപയോക്താവിനെ മാത്രം ശ്രദ്ധിക്കുക. കന്പനി ഉള്ളിലേക്കു നോക്കുന്ന അബദ്ധം ഒഴിവാക്കുക. ഉപയോക്താവിനു പകരം കന്പനിയെപ്പറ്റി ചിന്തിക്കുന്ന ദിവസം അന്ത്യത്തിന്റെ ആരംഭം കുറിച്ചിരിക്കും. ആ ദിവസം എത്ര അകലെയാക്കാമോ അത്രയും ആയുസ് നീട്ടിക്കിട്ടും.’’’’ ലോകത്തിലെ ഏറ്റവും സന്പന്ന വ്യക്തിയായ ബെസോസ് പറഞ്ഞു.
54 വയസുള്ള ബെസോസിന്റെ സന്പത്ത് 15,100 കോടി ഡോളർ (10.91 ലക്ഷം കോടി രൂപ) വരും. ഇന്ത്യയുടെ പ്രത്യക്ഷനികുതിവരുമാനത്തോളം വരുന്ന തുകയാണിത്.
ആമസോണും പൊളിയും...
11:09 PM Nov 17, 2018 | Deepika.com