മുംബൈ: ഡോളർ ഇതാദ്യമായി 69 രൂപയ്ക്കു മുകളിൽ ക്ലോസ് ചെയ്തു. നേരത്തേ രണ്ടുതവണ വ്യാപാരത്തിനിടയിൽ 69 കടന്നിട്ടുണ്ടെങ്കിലും ഇന്നലെയാണ് ക്ലോസിംഗ് അതിനു മുകളിലായത്. 69.05 രൂപയിൽ ക്ലോസ് ചെയ്തപ്പോൾ ഡോളറിന് ഇന്നലെ ഉണ്ടായ നേട്ടം 43 പൈസ. മേയ് 29-നുശേഷം രൂപയ്ക്ക് ഒരു ദിവസമുണ്ടായ ഏറ്റവും വലിയ തകർച്ചയാണിത്.
മറ്റു കറൻസികൾക്കെതിരേ ഡോളർ കരുത്തു നേടുന്നതിന്റെ ചുവടുപിടിച്ചാണു രൂപയുടെമേലും നേട്ടമുണ്ടാക്കുന്നത്. ഇതോടെ 70 രൂപയ്ക്കു മുകളിലേക്കാണു ഡോളർ എന്നു മിക്കവരും വിധിയെഴുതി. യുഎസ് സന്പദ്ഘടന ശക്തമായാണു മുന്നോട്ടുപോകുന്നതെന്നും ഫെഡറൽ റിസർവ് ബോർഡ് (ഫെഡ്) തലവൻ ജെറോം പവൽ പ്രസ്താവിച്ചതു ഡോളറിനെ സഹായിച്ചു.
ഇന്ത്യക്കു ക്രൂഡ് ഓയിൽ വിലക്കയറ്റം മൂലം വ്യാപാര കമ്മി കൂടുന്നതു പ്രശ്നമാകും. അത് വിദേശ ഇടപാടുകളുടെ ബാക്കി പത്രമായ കറന്റ് അക്കൗണ്ടിലെ കമ്മി ജിഡിപിയുടെ മൂന്നു ശതമാനത്തിലേക്ക് എത്തിക്കുമെന്നാണ് ആശങ്ക. രാജ്യത്തു വിലക്കയറ്റം കൂടുന്നതും രൂപയ്ക്കു ക്ഷീണമാണ്.
ഡോളറിന് 69.05 രൂപ
01:02 AM Jul 20, 2018 | Deepika.com