ന്യൂയോർക്ക്: ഫേസ്ബുക്ക് സഹസ്ഥാപകൻ മാർക്ക് സുക്കർബർഗ് ലോകത്തിലെ മൂന്നാമത്തെ സന്പന്നനായി. വെള്ളിയാഴ്ച ഫേസ്ബുക്ക് ഓഹരികൾക്കു 2.4 ശതമാനം വില കൂടിയതോടെയാണിത്. നിക്ഷേപ വിദഗ്ധൻ വാറൻ ബഫറ്റിനെ നാലാം സ്ഥാനത്തേക്കു തള്ളി. 34 വയസുള്ള സുക്കർബർഗിന്റെ സന്പത്ത് 8160 കോടി ഡോളർ (5.61 ലക്ഷം കോടി രൂപ) ആയി. 87 വയസുള്ള ബഫറ്റിനേക്കാൾ 37.3 കോടി ഡോളർ കൂടുതലുണ്ട് സുക്കർബർഗിന്. മാർച്ച് അവസാനം ഫേസ്ബുക്ക് ഓഹരിയുടെ വില 152.22 ഡോളർ ആയിരുന്നത് വെള്ളിയാഴ്ച 203.23 ഡോളർ എന്ന റിക്കാർഡ് നിലയിലെത്തി.
ഭൂമുഖത്തെ ഏറ്റവും സന്പന്നൻ ആമസോൺ.കോം എന്ന ഇ കൊമേഴ്സ് കന്പനി തലവൻ ജെഫ് ബെസോസ് ആണ്. 14,090 കോടി ഡോളർ (9.69 ലക്ഷം കോടി രൂപ) ഉണ്ട് ബെസോസിന്. 1994-ൽ ഒരു പാർപ്പിടത്തിന്റെ കാർഷെഡിൽ തുടങ്ങിയതാണ് ഓൺലൈൻ വ്യാപാരസ്ഥാപനമായ ആമസോൺ. കോം. രണ്ടാംസ്ഥാനത്തുള്ള മൈക്രോസോഫ്റ്റ് സഹസ്ഥാപകൻ ബിൽ ഗേറ്റ്സ് 9,270 കോടി ഡോളറിന് (6.37 ലക്ഷം കോടി രൂപ) ഉടമയാണ്.
ഫേസ്ബുക്ക് മേധാവി മൂന്നാമത്തെ അതിസന്പന്നൻ
01:12 AM Jul 08, 2018 | Deepika.com