സീയൂൾ: രണ്ടു വട്ടം ദക്ഷിണകൊറിയയുടെ പ്രധാനമന്ത്രിയായ കിം ജോംഗ് പിൽ(92) അന്തരിച്ചു. ദക്ഷിണകൊറിയൻ ചാരസംഘടനയുടെ സ്ഥാപകനാണ്.
സൈന്യത്തിൽനിന്നു കേണലായി വിരമിച്ച കിം, മുൻ ഏകാധിപതി പാർക് ചുംഗ് ഹീയുടെ വിശ്വസ്തനായിരുന്നു. 1961ലെ അട്ടിമറിയിൽ പാർക്കിനെ അധികാരത്തിലേറാൻ സഹായിച്ചു. ഇക്കാലത്താണ് കൊറിയൻ സെൻട്രൽ ഇന്റലിജൻസ് ഏജൻസി എന്ന ചാരസംഘടന സ്ഥാപിച്ചത്. 1971 മുതൽ 1975 വരെ പാർക്കിന്റെ കീഴിൽ പ്രധാനമന്ത്രിയായി. രാഷ്ട്രീയ എതിരാളികളെ അമർച്ചചെയ്യാൻ ചാരസംഘടനയെ ഉപയോഗിച്ചു.
പാർക്ക് കൊല്ലപ്പെട്ട ശേഷം കുറച്ചുനാൾ അമേരിക്കയിലായിരുന്നു. മടങ്ങിവന്നു രാഷ്ട്രീയത്തിലിറങ്ങിയ കിം, ശത്രുവായിരുന്ന കിം ദാവേ ജുംഗിനെ 1997ലെ തെരഞ്ഞെടുപ്പിൽ പ്രസിഡന്റാകാൻ സഹായിച്ചു. 1998-2000 കാലഘട്ടത്തിൽ രണ്ടാമതും പ്രധാനമന്ത്രിയായി. 2004ൽ രാഷ്ട്രീയം വിട്ടു.
മുൻ ദക്ഷിണകൊറിയൻ പ്രധാനമന്ത്രി കിം ജോംഗ് പിൽ അന്തരിച്ചു
10:47 PM Jun 23, 2018 | Deepika.com