വാഷിംഗ്ടൺ ഡിസി: എച്ച്-1 ബി വീസക്കാരെ അമേരിക്കയിൽനിന്നു പുറത്താക്കാൻ പുതിയ തന്ത്രങ്ങൾ പയറ്റി പ്രസിഡന്റ് ഡോണൾഡ് ട്രംപ്. എച്ച്-1 ബി വീസക്കാരുടെ പങ്കാളികൾക്ക് അമേരിക്കയിൽ ജോലി ചെയ്യാൻ അനുമതി നല്കുന്ന നടപടി റദ്ദാക്കാനാണ് ട്രംപിന്റെ നീക്കം.
മുൻ പ്രസിഡന്റ് ബറാക് ഒബാമ 2015ൽ ഏർപ്പെടുത്തിയ സൗകര്യമാണ് ട്രംപ് ഇല്ലാതാക്കുന്നത്. ഗ്രീൻ കാർഡിനു കാത്തിരിക്കുന്ന എച്ച്-1ബി വീസക്കാരുടെ പങ്കാളികൾക്ക് എച്ച്-4 ആശ്രിത വീസയിൽ തൊഴിൽ ചെയ്യുന്നതിനാണ് ഒബാമ ഭരണകൂടം അനുമതി നല്കിയത്. 2016ൽ 41,000 എച്ച്-4 വീസ അനുവദിച്ചു. ഈ വർഷം ജൂൺ വരെ 36,000 വീസകളും അനുവദിച്ചു.
സാങ്കേതിക പരിജ്ഞാനം കൂടുതൽ വേണ്ട തൊഴിലുകൾക്ക് അനുവദിക്കുന്ന എച്ച്-1 ബി വീസ ഏറെ പ്രയോജനപ്പെടുത്തുന്നത് ഇന്ത്യയും ചൈനയുമാണ്. അമേരിക്കയിലെ തൊഴിലുകൾ അമേരിക്കക്കാർക്ക് എന്ന ട്രംപിന്റെ നയം പിന്തുടർന്നാണ് പുതിയ നീക്കങ്ങൾ. ആഭ്യന്തര സുരക്ഷാ വകുപ്പ് നടപടികൾ ആരംഭിച്ചു.
എച്ച്-1 ബി വീസക്കാരുടെ പങ്കാളികൾക്കു തൊഴിൽ നിഷേധിക്കാൻ നീക്കം
01:33 AM Dec 17, 2017 | Deepika.com