ന്യൂയോർക്ക്: ഉത്തരകൊറിയൻ ഏകാധിപതി കിം ജോംഗ് ഉൻ അധികാലം ഉണ്ടാകില്ലെന്ന് അമേരിക്കൻ പ്രസിഡന്റ് ഡോണൾഡ് ട്രംപ്. അമേരിക്കയിലേക്കു മിസൈൽ വിടേണ്ടിവരുമെന്ന് ഉത്തരകൊറിയൻ വിദേശകാര്യമന്ത്രി റിയോംഗ്-ഹോ യുഎൻ പൊതുസഭയിൽ പ്രസംഗിച്ചതിനു മറുപടിയിട്ടാണ് ട്രംപ് ഇക്കാര്യം ട്വീറ്റ് ചെയ്തത്.
ഉത്തരകൊറിയയുടെ വിദേശകാര്യമന്ത്രി യുഎന്നിൽ പറഞ്ഞതു കേട്ടു. ലിറ്റിൽ റോക്കറ്റ്മാന്റെ(കിമ്മിനെ ട്രംപ് കളിയാക്കി വിളിക്കുന്നത്) സങ്കൽപ്പങ്ങൾ ആവർത്തിക്കാൻ നിന്നാൽ, രണ്ടുപേരും അധികകാലം ഇവിടെ ഉണ്ടാവില്ല- ട്രംപ് പറഞ്ഞു.
ട്രംപിന്റെ തലയ്ക്കു സ്ഥിരതയില്ലെന്നാണു റിയോംഗ്-ഹോ യുഎന്നിൽ പ്രസംഗിച്ചത്. ആവശ്യമെങ്കിൽ ഉത്തരകൊറിയയെ മുഴുവനായി നശിപ്പിക്കുമെന്നാണ് അയാൾ പറയുന്നത്. അങ്ങനെയാണെങ്കിൽ ഞങ്ങളുടെ റോക്കറ്റുകൾ അമേരിക്കയുടെ മുഴുവൻ മേഖലയിലും എത്തുമെന്ന് റിയോംഗ്-ഹോ പറഞ്ഞു. ട്രംപിന്റെ തലയ്ക്കു സ്ഥിരതയില്ലെന്നു കിമ്മും നേരത്തേ പറഞ്ഞിരുന്നു.
ഇതിനിടെ, ശനിയാഴ്ച ഉത്തരകൊറിയിലുണ്ടായ ഭൂചലനം ആണവപരീക്ഷണത്തിന്റെ ഫലമല്ലെന്നു ചൈന വിശദീകരിച്ചു. നേരത്തേ ഇങ്ങനെ ഒരു സാധ്യതയുണ്ടെന്നു ചൈന പറഞ്ഞിരുന്നു.
വാക് പോര് നിലയ്ക്കുന്നില്ല;കിം അധികകാലം ഉണ്ടാവില്ലെന്നു ട്രംപ്
11:25 PM Sep 24, 2017 | Deepika.com