കൽപ്പറ്റ: രാജ്യത്ത് വർധിച്ചുവരുന്ന വർഗീയ ഫാസിസ്റ്റ് ചിന്താഗതികൾക്കെതിരെയുള്ള പോരാട്ടത്തിന് കാന്പസുകളെ സജ്ജമാക്കണമെന്ന് എം.ഐ. ഷാനവാസ് എംപി.
വർഗീയതയ്ക്കെതിരെയുള്ള പോരാട്ടം കാന്പസുകളിൽ നിന്ന് ആരംഭിക്കണം. ലോകത്ത് വന്ന വലിയ മാറ്റങ്ങൾക്ക് ചാലക ശക്തിയായി മാറിയത് വിദ്യാർത്ഥി മുന്നേറ്റങ്ങളാണ്. രാജ്യത്തിന്റെ മതേതര ജനാധിപത്യ മുഖം വീണ്ടെടുക്കാൻ വിദ്യാർഥി സമൂഹം ഉണർന്ന് പ്രവർത്തിക്കണമെന്ന് അദ്ദേഹം അഭിപ്രായപ്പെട്ടു. പുതുതായി തെരഞ്ഞെടുക്കപ്പെട്ട കെഎസ്്യു ജില്ലാ കമ്മിറ്റിയുടെ ചുമതലയേക്കൽ ചടങ്ങ് ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.
കെഎസ്്യുവിന്റെ പുതിയ പ്രസിഡന്റായി തെരഞ്ഞെടുക്കപ്പെട്ട അമൽ ജോയിയെ മുൻ ജില്ലാ പ്രസിഡന്റും കെഎസ്്യു സംസ്ഥാന വൈസ് പ്രസിഡന്റുമായ ജഷീർ പള്ളിവയൽ അധികാര പത്രിക കൈമാറി. ഡിസിസി പ്രസിഡന്റ് ഐ.സി. ബാലകൃഷ്ണൻ എംഎൽഎ അധ്യക്ഷത വഹിച്ചു. കെഎസ്്യു സംസ്ഥാന പ്രസിഡന്റ് കെ.എം. അഭിജിത്ത് മുഖ്യ പ്രഭാഷണം നടത്തി.
കെ.കെ. ഏബ്രഹാം, കെ.എൽ. പൗലോസ്, പി.വി. ബാലചന്ദ്രൻ, മംഗലശേരി മാധവൻ മാസ്റ്റർ, എം.എ. ജോസഫ്, പി.പി. ആലി, എ.പി. ശ്രീകുമാർ, വി.എ. മജീദ്, കെ.ഇ. വിനയൻ, നജീബ് കരണി, എം.ജി. ബിജു, പോൾസണ് കൂവക്കൽ, ശോഭന കുമാരി, വിജയമ്മ ടീച്ചർ, ചിന്നമ്മ ജോസ്, സി. ജയപ്രസാദ്, ടി.ജെ. ഐസക്ക്, കെഎസ്്യു സംസ്ഥാന ഭാരവാഹികളായ പി. ജഷീർ, പി. റംഷാദ്, ജില്ലാ പ്രസിഡന്റ് അമൽ ജോസ് എന്നിവർ പ്രസംഗിച്ചു.
കാന്പസുകൾ സജ്ജമാകണം: എം.ഐ. ഷാനവാസ് എംപി
12:33 AM Apr 18, 2017 | Deepika.com