1930 നവംബർ 12 നാണ് ഒന്നാം വട്ടമേശ സമ്മേളനത്തിന്റെ തുടക്കം. ലണ്ടനിലെ ഹൗസ് ഓഫ് ലോർഡ്സ് എന്ന റോയൽ ഗാലറിയിലായിരുന്നു സമ്മേളനം. ജോർജ് അഞ്ചാമൻ രാജാവാണ് ഒന്നാം വട്ടമേശ സമ്മേളനം ഉദ്ഘാടനം ചെയ്തത്. അന്നത്തെ ബ്രിട്ടീഷ് പ്രധാനമന്ത്രി റാംസേ മക്ഡൊണാൾഡ് ആയിരുന്നു അധ്യക്ഷൻ. ബ്രിട്ടീഷ് പ്രതിനിധികളായി 16 പേരും ബ്രിട്ടീഷ് ഇന്ത്യയിൽനിന്ന് 58 രാഷ്ട്രീയ നേതാക്കളും ഇന്ത്യയിലെ നാട്ടുരാജ്യങ്ങളിൽനിന്ന് 16 പ്രതിനിധികളും ഒന്നാം വട്ടമേശ സമ്മേളനത്തിൽ പങ്കെടുത്തു.
ആഗാഖാൻ, മുഹമ്മദലി ജിന്ന, മൗലാന മുഹമ്മദലി, തേജ് ബഹാദൂർ സപ്രൂ, ബി.ആർ. അംബേദ്കർ തുടങ്ങിയവരാണ് പങ്കെടുത്തവരിൽ പ്രമുഖർ. മുസ്ലിം ലീഗിന്റെയും ഡിപ്രസ്ഡ് ക്ലാസിന്റെയും പ്രതിനിധികളും പങ്കെടുത്തു. നിസഹകരണ പ്രസ്ഥാനം പ്രക്ഷുബ്ധമായിരുന്ന സമയമായതിനാൽ ഈ സമ്മേളനത്തെ ഇന്ത്യയിലെ പ്രമുഖ രാഷ്ട്രീയ നേതാക്കളെല്ലാം ബഹിഷ്കരിച്ചു.
ഇന്ത്യൻ നാഷണൽ കോണ്ഗ്രസും സമ്മേളനം ബഹിഷ്കരിക്കുകയാണു ചെയ്തത്. യോഗത്തിൽ ഓൾ ഇന്ത്യാ ഫെഡറേഷൻ എന്ന ആശയം ചർച്ചയ്ക്കുവച്ചു.
സമ്മേളനത്തിൽ പങ്കെടുത്ത എല്ലാ ഗ്രൂപ്പുകളും ഈ ആശയത്തെ അനുകൂലിച്ചു. രാജഭരണത്തിലുള്ള പ്രദേശങ്ങൾക്കും സ്വയംഭരണം നൽകുമെന്നായതോടെ അവരും ഈ ആശയത്തെ അംഗീകരിച്ചു. മുസ്ലിം ലീഗും പുതിയ ഫെഡറേഷനെ അംഗീകരിക്കുകയുണ്ടായി. എന്നാൽ പ്രവിശ്യാതലത്തിൽ പ്രാതിനിധ്യ സർക്കാർരീതി ആദ്യം നടപ്പിലാക്കണമെന്നായിരുന്നു ബ്രിട്ടീഷുകാരുടെ ആവശ്യം.
ഒന്നാം വട്ടമേശ സമ്മേളനം
11:48 PM Nov 18, 2021 | Deepika.com