മിത്ത് എന്ന വാക്കാണ് ഇപ്പോൾ കേരളത്തിലെ ഒരു പ്രധാന ചർച്ചാ വിഷയം. മിത്തുമായി ബന്ധപ്പെട്ട് നിരവധി വാദപ്രതിവാദങ്ങളാണ് അരങ്ങേറിക്കൊണ്ടിരിക്കുന്നത്.
നിയമസഭാ സ്പീക്കർ എ.എൻ.ഷംസീറിന്റെ പ്രസ്താവനയുമായി ബന്ധപ്പെട്ടാണ് ‘മിത്ത്' ഇപ്പോൾ പ്രശസ്തമായത്. മിത്ത് വിവാദം സമൂഹമാധ്യമങ്ങളിൽ ചർച്ചയാകുമ്പോൾ മറ്റൊരു ‘മിത്തു’മായി നടൻ രമേശ് പിഷാരടിയും എത്തി.
ഫെയ്സ്ബുക്ക് ഫ്രണ്ട്സ് എന്നത് പലപ്പോഴും ഒരു മിത്താണെന്ന് നടൻ പറയുന്നു. സൗഹൃദങ്ങൾക്ക് വേണ്ടിയാണ് ഫെയ്സ്ബുക്ക് ആരംഭിച്ചത്. എന്നാല് ഇന്ന് ഫെയ്സ്ബുക്ക് മതപരവും കക്ഷി രാഷ്ട്രീയങ്ങൾക്കുവേണ്ടിയുള്ള കൊലവിളികൾ കൊണ്ട് നിറഞ്ഞിരിക്കുകയാണെന്നും അദ്ദേഹം പറയുന്നു.
‘ഫെയ്സ്ബുക്ക് ‘ഫ്രണ്ട്സ്’ എന്നത് പലപ്പോഴും ഒരു മിത്താണ്. മതത്തിനും കക്ഷി രാഷ്ട്രീയത്തിനും വേണ്ടിയുള്ള കൊലവിളികൾ കൊണ്ടും തർക്കങ്ങൾ കൊണ്ടും ഇവിടം നിറഞ്ഞിരിക്കുന്നു. സൗഹൃദങ്ങൾക്ക് വേണ്ടി ആയിരുന്നു ഫെയ്സ്ബുക്ക് ആരംഭിച്ചത്.
ചങ്ങാത്തം നിലനിർത്താൻ, നിർമിക്കാൻ, വീണ്ടെടുക്കാൻ.. അങ്ങനെ പലതിനും...എന്നാൽ ഫെയ്സ്ബുക്ക് ഉപയോഗത്തിന് അതിന്റെ കൗമാരം കടക്കാറാകുമ്പോഴേക്കും മനുഷ്യനെന്ന പോലെ ബാല്യത്തിന്റെ നിഷ്കളങ്കത കൈമോശം വന്നിരിക്കുന്നു.
എല്ലാ മതങ്ങളും, രാഷ്ട്രീയ പാർട്ടികളും സ്നേഹിക്കാനാണത്രെ പഠിപ്പിക്കുന്നത്. ഫെയ്സ്ബുക്ക് സൗഹൃദങ്ങൾക്ക് വേണ്ടിയാണ് ഉണ്ടാക്കിയത് എന്നു പറയും പോലെ. രമേശ് പിഷാരടിയുടെ വാക്കുകൾ.
ഫെയ്സ്ബുക്ക് ഫ്രണ്ട് എന്നതും ഒരു മിത്താണ്: രമേശ് പിഷാരടി
11:22 AM Aug 05, 2023 | Deepika.com