ശബരിമലയിലെത്തി അയ്യപ്പനെ തൊഴുത് ബാലതാരം ദേവനന്ദ. പത്താം പിറന്നാളിനോടനുബന്ധിച്ചാണ് ദേവനന്ദ അയ്യപ്പനെ കാണാനെത്തിയത്. ആകാംഷയോടെ തൊഴുതുനിൽക്കുന്ന താരത്തിന്റെ വീഡിയോ വൈറലായിരിക്കുകയാണ്.
ഇനി അയ്യപ്പനെ കാണണമെങ്കിൽ 40 വർഷം കാത്തിരിക്കണമെന്നും ദേവനന്ദ കുറിച്ചു. ശബരമലയിൽ നിന്നുള്ളൊരു വീഡിയോയും താരം സമൂഹമാധ്യമത്തിലൂടെ പങ്കുവച്ചിട്ടുണ്ട്.
‘‘ഇനി സ്വാമിയെ കാണാൻ 40 വർഷത്തെ കാത്തിരിപ്പാണ്, അതിലും വലുതല്ല മറ്റ് എന്തിന് വേണ്ടി ഉള്ള കാത്തിരിപ്പും, കഴിഞ്ഞ ദിവസം മലയിൽ പോയി ഭഗവാനെ കണ്ടപ്പോൾ.’’ ശബരിമലയിൽ ദർശനം നടത്തുന്ന വീഡിയോ പങ്കുവച്ചുകൊണ്ട് ദേവനന്ദ കുറിച്ചു.
അയ്യപ്പനെ ഏറെ ആരാധിക്കുന്ന ദേവനന്ദ 75 ദിവസം വ്രതമനുഷ്ഠിച്ചാണ് മാളികപ്പുറത്തിൽ അഭിനയിച്ചത്. പത്തു വയസ്സ് പൂർത്തിയാകുന്ന ദേവനന്ദക്ക് ഇനി ശബരിമല സന്ദർശിക്കണമെങ്കിൽ നാല്പത് വർഷം കാത്തിരിക്കേണ്ടി വരും.
ഉണ്ണി മുകുന്ദൻ നായകനായെത്തിയ മാളികപ്പുറം എന്ന സിനിമയിലൂടെ പ്രേക്ഷകരുടെ മനം കവർന്ന കുഞ്ഞു താരമാണ് ദേവനന്ദ. നേരത്തെ സിനിമയിലെത്തിയ താരമാണെങ്കിലും മാളികപ്പുറം ഒന്ന ഒറ്റ ചിത്രത്തിലെ അഭിനയത്തിലൂടെ ഏവരും ദേവനന്ദയുടെ ആരാധകരായി മാറി.
തൊട്ടപ്പൻ എന്ന ചിത്രത്തിലൂടെ അഭിനയരംഗത്തെത്തിയ ദേവനന്ദ മൈ സാന്റാ, മിന്നൽ മുരളി, ഹെവൻ തുടങ്ങി നിരവധി ചിത്രങ്ങളിൽ അഭിനയിച്ചിട്ടുണ്ട്. എറണാകുളം കളമശ്ശേരി രാജഗിരി പബ്ലിക് സ്കൂളില് നാലാം ക്ലാസ് വിദ്യാർഥിയാണ് ഈ കുട്ടിത്താരം.
ഇനി സ്വാമിയെ കാണാൻ 40 വർഷം കാത്തിരിക്കണം; അതിലും വലുതല്ല മറ്റൊന്നിനുവേണ്ടിയുള്ള കാത്തിരിപ്പ്: ദേവനന്ദ
02:48 PM Jul 25, 2023 | Deepika.com