നടൻ വിജയ് രാഷ്ട്രീയത്തിലേക്ക് പ്രവേശിക്കുമെന്ന അഭ്യൂഹങ്ങൾ ശക്തമാകുന്നു. താരത്തിന്റെ ആരാധക സംഘടനയായ വിജയ് മക്കൾ ഇയക്കം ജില്ലാ – മണ്ഡലം ഭാരവാഹികളുമായി കഴിഞ്ഞ ദിവസം വിജയ് കൂടിക്കാഴ്ച നടത്തിയതാണ് രാഷ്ട്രീയ പ്രവേശനത്തിനായുള്ള മുന്നൊരുക്കമായി കാണുന്നത്.
രാഷ്ട്രീയത്തിൽ ഇറങ്ങുകയാണെങ്കിൽ അഭിനയം പൂർണമായും ഉപേക്ഷിക്കുമെന്നു വിജയ് അറിയിച്ചെന്നു യോഗത്തിൽ പങ്കെടുത്തവർ വെളിപ്പെടുത്തി. ചെന്നൈയ്ക്ക് സമീപം പനയൂരിലുള്ള വിജയ്യുടെ ഫാം ഹൗസിലായിരുന്നു യോഗം ചേർന്നത്.
രാഷ്ട്രീയത്തിലേക്ക് ഉടൻ പ്രവേശിക്കുന്നതുമായി ബന്ധപ്പെട്ട കാര്യങ്ങൾ വിജയ് പങ്കുവച്ചിട്ടില്ലെന്നാണ് യോഗത്തിൽ പങ്കെടുത്ത പ്രവർത്തകർ പറയുന്നത്. ഓരോ നിയമസഭാ മണ്ഡലങ്ങളിലെയും ഭാരവാഹികളെ നേരിൽ കണ്ടാണ് യോഗം.
234 മണ്ഡലങ്ങളിലെ ദളപതി വിജയ് മക്കൾ ഇയക്കത്തിന്റെ ചുമതലക്കാരുമായാണ് വിജയ് കൂടിക്കാഴ്ച നടത്തുന്നത്. ചൊവ്വാഴ്ച 15 ജില്ലകളിൽ നിന്നുള്ള 115 ഭാരവാഹികളെയാണ് നേരിൽ കണ്ടത്. കൂടിക്കാഴ്ച ബുധനാഴ്ചയും തുടരും.