ട്രോള്‍ വരുമെന്ന് അറിഞ്ഞുകൊണ്ട് തന്നെയാണ് സ്ത്രീ വേഷത്തിലെത്താൻ തയാറായതെന്ന് രാജസേനൻ. ‘ഞാനും പിന്നൊരു ഞാനും’ എന്ന സിനിമയുടെ പ്രമോഷന്‍റെ ഭാഗമായാണ് രാജസേനൻ തിയറ്ററുകളിൽ സ്ത്രീവേഷത്തിലെത്തിയത്.
ട്രോള്‍ വരുമെന്ന് അറിഞ്ഞിട്ടു തന്നെയാണ് ഈ വേഷത്തിലെത്തിയത്. ട്രോളുകൾ ആസ്വദിക്കുന്ന ആളാണ് ഞാൻ. അതുചെയ്യുന്നവരെയും ഇഷ്ടപ്പെടുന്നു. ആ ട്രോളുകൾ കണ്ട് ചിരിക്കുന്ന ആളുകൾ ഈ സിനിമ കാണാൻ തിയറ്ററിലെത്തുമല്ലോ?
ഇതിനു പിന്നിലൊരു ടീം ഉണ്ട്. അവരുമായി ബന്ധപ്പെട്ടും ചർച്ച ചെയ്തുമാണ് ഈ വേഷത്തിലെത്താമെന്ന് തീരുമാനിച്ചത്. സർ ഇങ്ങനെ ചെയ്യുമോ എന്നായിരുന്നു അവരുടെ സംശയം.
എനിക്കൊരു മടിയുമില്ല, ഞാൻ ചെയ്യും എന്ന് ഉറപ്പു പറഞ്ഞു. രാവിലെ എന്‍റെ മീശയെടുത്തു, ഒരു നല്ല കാര്യത്തിനു വേണ്ടിയായതിനാൽ സന്തോഷമുണ്ട്. രാജസേനൻ പറഞ്ഞു.
സിനിമയുടെ പ്രദർശനദിവസം സ്ത്രീവേഷത്തിലെത്തി സംവിധായൻ രാജസേനൻ എല്ലാവരെയും ഞെട്ടിച്ചിരുന്നു. ഞാനും പിന്നൊരു ഞാനും എന്ന ചിത്രത്തിന്‍റെ ഷോ കാണാനായിട്ടാണ് പെൺവേഷം കെട്ടി രാജസേനൻ എത്തിയത്.
കൊച്ചിയിലെ തിയറ്ററിലെത്തിയാണ് താരം സഹപ്രവർത്തകരെയും സിനിമാ കാണാനെത്തിയവരെയും ഒരേപോലെ ഞെട്ടിച്ചത്.
ഏഴുവർഷത്തെ ഇടവേളയ്ക്ക് ശേഷം രാജസേനൻ സംവിധാനം ചെയ്ത ചിത്രമാണ് ഞാനും പിന്നൊരു ഞാനും. ചിത്രത്തിന്‍റെ തിരക്കഥയും രാജസേനൻ തന്നെയാണ് ഒരുക്കിയിരിക്കുന്നത്.
ക്ലാപ്പിൻ മൂവി മേക്കേഴ്സ് പ്രൈവറ്റ് ലിമിറ്റഡാണ് ചിത്രം നിർമിക്കുന്നത്. ഇന്ദ്രൻസ്, സുധീർ കരമന, ജോയ് മാത്യു, മീര നായർ, ആരതി നായർ എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നു.
ഛായാഗ്രഹണം സാംലാൽ പി. തോമസ്, എഡിറ്റർ വി. സാജൻ,സ്ക്രിപ്റ്റ് അസിസ്റ്റന്‍റ് പാർവതി നായർ, ചീഫ് അസോസിയേറ്റ് ഡയറക്ടർ പ്രസാദ് യാദവ്, മേക്കപ്പ് സജി കാട്ടാക്കട, ആർട്ട്- സാബു റാം.
കോസ്റ്റ്യൂം ഇന്ദ്രൻസ് ജയൻ, കൊറിയോഗ്രാഫി ജയൻ ഭരതക്ഷേത്ര, പ്രൊഡക്ഷൻ കൺട്രോളർ എസ്. എൽ.പ്രദീപ്, സ്റ്റിൽസ് കാഞ്ചൻ ടി.ആർ., പിആർഒ മഞ്ജു ഗോപിനാഥ്.