നടൻ കൊല്ലം സുധിക്കൊപ്പം വാഹനപകടത്തിൽ പരിക്കേറ്റ് ചികിത്സയിൽ കഴിഞ്ഞിരുന്ന മിമിക്രി കലാകാരൻ മഹേഷ് കുഞ്ഞിമോൻ ജീവിതത്തിലേക്ക് തിരിച്ചുവരുന്നു. ഇപ്പോഴത്തെ ആരോഗ്യസ്ഥിതി പങ്കുവച്ചുകൊണ്ടുള്ള ഒരു വീഡിയോയിലാണ് മഹേഷ് ഇനിയും പൂർവാധികം ശക്തിയോടെ തിരിച്ചെത്തുമെന്നും പ്രാർഥനകൾ വേണമെന്നും ആവശ്യപ്പെട്ടത്.
അപകടത്തിൽ മഹേഷിന്റെ മുഖത്തും പല്ലുകൾക്കും ഗുരുതരമായ പരിക്കേറ്റിരുന്നു. തുടർന്ന് ഒൻപത് മണിക്കൂർ നീണ്ടുനിന്ന ശസ്ത്രക്രിയയ്ക്കും വിധേയനായി.
‘എനിക്കു വേണ്ടി പ്രാർഥിച്ച എല്ലാവരോടും ഞാൻ നന്ദി പറയുകയാണ്. ഞാൻ മിമിക്രി ആർട്ടിസ്റ്റും ഡബ്ബിംഗ് ആർട്ടിസ്റ്റുമാണ്. എല്ലാവർക്കും അറിയാം മിമിക്രി ആണ് എന്റെ ജീവിതം.
മിമിക്രിയിലൂടെയാണ് നിങ്ങൾ എല്ലാവരും എന്നെ തിരിച്ചറിഞ്ഞതും എന്നെ ഇഷ്ടപ്പെട്ടതും. ഇനി കുറച്ചു നാളത്തേക്ക് റെസ്റ്റാണ്. നിങ്ങൾ ആരും വിഷമിക്കണ്ട പഴയതിനേക്കാൾ അടിപൊളി ആയി ഞാൻ തിരിച്ചു വരും.
അപ്പോഴും നിങ്ങൾ എല്ലാവരും എന്റെ കൂടെ ഉണ്ടാകണം, എന്നെ പിന്തുണയ്ക്കണം എനിക്ക് വേണ്ടി പ്രാർഥിച്ച എല്ലാവരോടും ഞാൻ ഒരിക്കൽ കൂടി നന്ദി പറയുകയാണ്’ മഹേഷ് കുഞ്ഞുമോൻ പറയുന്നു.
ഇക്കഴിഞ്ഞ ജൂൺ അഞ്ചിനു പുലർച്ചെ നാലരയോടെ ദേശീയപാത 66 ലെ പനമ്പിക്കുന്നിൽ താരങ്ങൾ സഞ്ചരിച്ചിരുന്ന കാറും മിനി ലോറിയും കൂട്ടിയിടിച്ചായിരുന്നു അപകടമുണ്ടായത്.
തലയ്ക്കു പരിക്കേറ്റ സുധിയെ പെട്ടെന്നുതന്നെ കൊടുങ്ങല്ലൂരിലെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ഒപ്പമുണ്ടായിരുന്ന ബിനു അടിമാലിയും ഉല്ലാസ് അരൂരും സുഖം പ്രാപിച്ചു വരികയാണ്.
എല്ലാവർക്കും നന്ദി; ജീവിതത്തിലേക്ക് തിരിച്ചെത്തി മഹേഷ് കുഞ്ഞുമോൻ
10:45 AM Jun 26, 2023 | Deepika.com