തനിക്കെതിരെ പ്രചരിക്കുന്ന വ്യാജ വാർത്തകൾക്കെതിരെ രസകരമായ രീതിയിൽ പ്രതികരിച്ച് നടൻ ബാബുരാജ്. താരത്തെ ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചുവെന്ന തരത്തിൽ വ്യാജ വാർത്തകൾ ചില യൂട്യൂബ് ചാനലുകളിൽ വന്നിരുന്നു.
ജിമ്മില് വ്യായാമം ചെയ്യുന്ന വീഡിയോ പങ്കുവച്ചായിരുന്നു തന്റെ ആരോഗ്യത്തെക്കുറിച്ചുള്ള വ്യാജവാർത്തകൾക്കെതിരെ മറുപടിയുമായി ബാബുരാജ് എത്തിയത്.
‘കാർഡിയോ വർക്ഔട്ട് ചെയ്യുകയാണ്, അല്ലാതെ ആശുപത്രിയിലെ കാർഡിയോ വാർഡിൽ അല്ല ഞാൻ’ എന്ന തലക്കെട്ടോടെയാണ് ജിമ്മിലെ ട്രെഡ് മില്ലിൽ ഓടുന്ന വീഡിയോ ബാബുരാജ് പങ്കുവച്ചത്.
‘തലയ്ക്കു മീതേ ശൂന്യാകാശം താഴെ മരുഭൂമി’ എന്ന പാട്ടാണ് ബാബുരാജ് വീഡിയോയിൽ ഉൾപ്പെടുത്തിയിരിക്കുന്നത്.
ഗുരുതര ആരോഗ്യ പ്രശ്നങ്ങളോടുകൂടി നടൻ ബാബുരാജിനെ ആശുപത്രിയിൽ പ്രവേശിപ്പിച്ചിരിക്കുകയാണെന്നും എല്ലാവരും പ്രാർഥനയോടെ കാത്തിരിക്കുകയാണെന്നുമുള്ള തലക്കെട്ടോടെ കഴിഞ്ഞ ദിവസമാണ് ഒരു ഓൺലൈൻ മാധ്യമത്തിൽ വാർത്ത പ്രചരിച്ചത്.
നല്ല നിലാവുള്ള രാത്രി എന്ന സിനിമയാണ് ബാബുരാജിന്റേതായി പുറത്തിറങ്ങാനിരിക്കുന്നത്. മര്ഫി ദേവസി സംവിധാനം ചെയ്ത ചിത്രത്തിൽ ചെമ്പന് വിനോദ്, ബിനു പപ്പു, ഗണപതി, ജിനു ജോസഫ്, റോണി ഡേവിഡ് തുടങ്ങിയവരും പ്രധാന വേഷങ്ങളിലെത്തുന്നുണ്ട്.
"ബാബുരാജ് ഗുരുതരാവസ്ഥയിൽ'- വ്യാജവാർത്തയ്ക്ക് രസകരമായ മറുപടിയുമായി താരം
02:54 PM Jun 22, 2023 | Deepika.com