നിവിൻ പോളിയെ നായകനാക്കി ഹനീഫ് അദേനി സംവിധാനം ചെയ്യുന്ന ചിത്രത്തിലെ ഏറ്റവും പുതിയ ലൊക്കേഷൻ സ്റ്റില്ലാണ് താരത്തിന്റെ ആരാധകർ ഏറ്റെടുത്തിരിക്കുന്നത്. ഹാർലി-ഡേവിഡ്സൺ ഫാറ്റ് ബോബിലും ഡ്യൂൺ ബഗിയിലും കിടിലൻ ലുക്കിൽ നിവിൻ പോളി ഇരിക്കുന്ന ചിത്രങ്ങൾ ഫാൻ പേജുകളിൽ വൈറലാണ്.
വലിയ കാൻവാസിൽ ഒരുങ്ങുന്ന ചിത്രത്തിന്റെ ഷൂട്ടിംഗിനായി ബോൾട്ട് ക്യാമറകളും ജിമ്മി ജിബും ഡ്രോണുകളും അടക്കമുള്ള സന്നാഹങ്ങള് ചിത്രത്തില് കാണാം.
നിവിൻ പോളിയുടെ കരിയറിലെ 42-ാം ചിത്രമാണിത്. ജനുവരി 20-നാണ് യുഎഇയിൽ സിനിമയുടെ ചിത്രീകരണം തുടങ്ങിയത്. നാല് മാസങ്ങളിലായി രണ്ട് ഷെഡ്യൂളായിട്ടായിരുന്നു ഷൂട്ട് നടന്നത്. നിവിൻ പോളിയുടെ പുത്തൻ മേക്കോവർ ചിത്രങ്ങൾ സമൂഹ മാധ്യമങ്ങളിൽ അടുത്തിടെ വൈറലായിരുന്നു.
വൻ ബജറ്റിലൊരുങ്ങുന്ന സിനിമയുടെ ടൈറ്റിൽ അനൗൺസ്മെൻറ് ഉടൻ ഉണ്ടാകാനിടയുണ്ട്. ആർഷ ബൈജു, മമിത ബൈജു എന്നിവരാണ് ചിത്രത്തിൽ നായികമാരായെത്തുന്നത്.
ജാഫർ ഇടുക്കി, വിനയ് ഫോർട്ട്, വിജിലേഷ് തുടങ്ങിയവരും ചിത്രത്തിൽ പ്രധാന വേഷങ്ങളിൽ അഭിനയിക്കുന്നുണ്ട്.
മാജിക് ഫ്രെയിംസും പോളി ജൂനിയർ പിക്ചേഴ്സും ചേർന്നാണ് സിനിമയുടെ നിർമാണം. വിഷ്ണു തണ്ടാശ്ശേരിയാണ് ഛായാഗ്രാഹണം.
പ്രൊഡക്ഷൻ ഡിസൈൻ -സന്തോഷ് രാമൻ, കോസ്റ്റ്യൂം -മെൽവി ജെ., മ്യൂസിക് -മിഥുൻ മുകുന്ദൻ, എഡിറ്റിംഗ് -നിഷാദ് യൂസഫ്, മേക്കപ്പ് -ലിബിൻ മോഹനൻ. മാർക്കറ്റിംഗ് : സ്നേക്ക്പ്ലാന്റ്.
യുഎഇയിലും കേരളത്തിലുമാണ് സിനിമയുടെ ലൊക്കേഷനുകൾ. മിഖായേലിനുശേഷം നിവിൻ പോളിയും ഹനീഫ് അദേനിയും ഒന്നിക്കുമ്പോൾ ആരാധകർ ഏറെ പ്രതീക്ഷയിലാണ്.