ഒന്നാം വിവാഹവാർഷികം ആഘോഷിച്ച് നയൻതാരയും വിഗ്നേഷ് ശിവനും. 2022 ജൂൺ ഒൻപതിന് ചെന്നൈ മഹാബലിപുരത്ത് വച്ചാണ് ഇരുവരും വിവാഹിതരായത്.
വിവാഹവാർഷിക ദിനത്തിൽ വിഗ്നേഷ് ശിവൻ പങ്കുവച്ച ചിത്രങ്ങളാണ് ആരാധകരുടെ ഹൃദയം കീഴടക്കിയിരിക്കുന്നത്. ഇരട്ടക്കുട്ടികളായ ഉയിരിനെയും ഉലകത്തെയും മാറോട് ചേർത്തിരിക്കുന്ന നയൻതാരയുടെ ചിത്രമാണ് ഭർത്താവും സംവിധായകനുമായ വിഗ്നേഷ് പങ്കുവച്ചിരിക്കുന്നത്.
ഉയർച്ചയും താഴ്ചയും തിരിച്ചടികളും നിറഞ്ഞ വർഷമാണ് കടന്നുപോയതെന്നും എന്നാൽ കുടുംബത്തോട് ചേർന്നിരിക്കുന്പോൾ ആ സങ്കടകടലുകൾ സന്തോഷമായി മാറുമെന്നും വിഗ്നേഷ് കുറിച്ചു.
‘‘എൻ ഉയിരോട ആധാരം നീങ്കൾധാനേ....ഒരുപാട് മനോഹരനിമിഷങ്ങളിലൂടെയാണ് ഒരുവർഷം കടന്നുപോയത്. ഉയർച്ചയും താഴ്ചകളുമുണ്ടായി. അപ്രതീക്ഷിതമായ തിരിച്ചടികൾ... പരീക്ഷണത്തിന്റെ സമയങ്ങളായിരുന്നു.
എന്നാൽ അനുഗ്രഹം ചൊരിയുന്ന കുടുംബത്തിനരികിലേക്ക് തിരിച്ചെത്തുമ്പോൾ ആ വേദനകളൊക്കെ സന്തോഷമായി മാറും. സ്വപ്നങ്ങൾ പിന്തുടരാനുള്ള നമ്മളിൽ ആത്മവിശ്വാസവും ശക്തിയും ഉണ്ടാകും.–നയൻതാരയുടെയും മക്കളുടെയും ചിത്രം പങ്കുവച്ച് വിഘ്നേഷ് കുറിച്ചു.
വിവാഹവാർഷികമായി ബന്ധപ്പെട്ടുള്ള കുറിപ്പും വിഘ്നേഷ് പങ്കുവയ്ക്കുകയുണ്ടായി. ‘‘നമ്മള് ഇന്നലെ വിവാഹിതരായതുപോലെ തോന്നുന്നു. അതിനിടയിലാണ് സുഹൃത്തുക്കള് ഒന്നാം വിവാഹവാർഷികം ആശംസിച്ചുകൊണ്ടുള്ള മെസേജുകൾ അയക്കുന്നത്.
ലവ് യൂ തങ്കമേ, എല്ലാവിധ അനുഗ്രഹത്തോടെയും സ്നേഹത്തോട് കൂടിയും നമ്മളൊന്നിച്ചുള്ള ജീവിതം തുടങ്ങി. ഇനിയും കുറേ പോവാനുണ്ട്. ഒന്നിച്ച് ചെയ്യാന് കുറേ കാര്യങ്ങൾ ചെയ്യാനുണ്ട്.’’– വിഘ്നേഷ് പറയുന്നു.
ഉയിർ, ഉലകം എന്നാണ് പൊന്നോമനകളുടെ ഓമനപ്പേര്. ഉയിരിന്റെ യഥാർഥ പേര് രുദ്രൊനീല് എന്. ശിവ എന്നും ഉലകിനെ ദൈവിക് എന്. ശിവ എന്നുമാണ് വിളിക്കുന്നത്.
ഇതിൽ ‘എൻ’ എന്നത് ലോകത്തിലെ ഏറ്റവും മികച്ച അമ്മയായ നയൻതാരയുടെ പേരിന്റെ ആദ്യാക്ഷരമാണെന്ന് വിഘ്നേഷ് നേരത്തെ പറഞ്ഞിരുന്നു. കഴിഞ്ഞ വർഷം ഒക്ടോബർ ഒമ്പതിനാണ് നയൻതാരക്കും വിഘ്നേഷ് ശിവനും ഇരട്ടക്കുട്ടികള് ജനിക്കുന്നത്.
പഠാന് ശേഷം ഷാറുഖ് ഖാൻ നായകനാകുന്ന ജവാൻ സിനിമയാണ് നയൻതാരയുടെ പുതിയ റിലീസ്. തമിഴ് സംവിധായകനായ അറ്റ്ലിയാണ് ചിത്രം സംവിധാനം ചെയ്യുന്നത്. വിജയ് സേതുപതിയാണ് ചിത്രത്തിലെ വില്ലന്.