നടൻ ആശിഷ് വിദ്യാർഥി വിവാഹിതനായി. ആസാം സ്വദേശിനി രൂപാലി ബറുവയാണ് വധു. അറുപതുകാരനായ താരത്തിന്റെ രണ്ടാം വിവാഹമാണിത്. കോൽക്കത്ത ക്ലബ്ബിൽ നടന്ന ചടങ്ങിൽ ഇരുവരുടെയും അടുത്തബന്ധുക്കളും സുഹൃത്തുക്കളും മാത്രമാണ് പങ്കെടുത്തത്.
കേരളത്തനിമയിലുള്ള വസ്ത്രങ്ങൾ അണിഞ്ഞുള്ള ഇരുവരുടെയും വിവാഹ ചിത്രങ്ങള് സമൂഹമാധ്യമങ്ങളിൽ വൈറലാണ്.
"എന്റെ ജീവിതത്തിന്റെ ഈ ഘട്ടത്തിൽ രൂപാലിയെ വിവാഹം കഴിക്കുന്നത് അസാധാരണമായ ഒരു വികാരമാണ്. ഞങ്ങൾ രാവിലെ കോടതിയിൽവെച്ച് വിവാഹിതരായി. വൈകിട്ട് ഒരു സൽക്കാരവും നടത്തി', ആശിഷ് മാധ്യമങ്ങളോട് പറഞ്ഞു.
ഫാഷൻ സംരംഭകയാണ് റുപാലി. ഗുവാഹത്തിയിൽ പ്രമുഖ ഫാഷൻ വസ്ത്ര സ്ഥാപനം നടത്തുന്ന റുപാലിയെ അവിടെ വച്ചാണ് ആശിഷ് വിദ്യാർഥി പരിചയപ്പെടുന്നത്. പിന്നീട് ആ പരിചയം പ്രണയത്തിലേക്കും വിവാഹത്തിലേക്കുമെത്തുകയായിരുന്നു.
ദേശീയ അവാർഡ് ജേതാവായ ആശിഷ് വിദ്യാർഥിയുടെ ആദ്യ ഭാര്യ പ്രശസ്ത ബംഗാളി നടി ശകുന്തള ബറുവയുടെ മകൾ രജോഷിയാണ്. അർത്ത് വിദ്യാർഥി ഇവരുടെ ഏകമകനാണ്. ആശിഷ് വിദ്യാർഥി ആൻഡ് അസോസിയേറ്റ്സ് എന്ന സ്ഥാപനത്തിന് തുടക്കമിട്ടവരിൽ ഒരാളാണ് രജോഷി.
ബോളിവുഡിന് പുറമെ തെലുങ്ക്, തമിഴ്, കന്നഡ, മലയാളം സിനിമകളിൽ ശ്രദ്ധേയ വേഷങ്ങൾ ചെയ്തിട്ടുള്ള നടനാണ് ആശിഷ് വിദ്യാർഥി. 1995-ൽ മികച്ച സഹനടനുള്ള ദേശീയ ചലച്ചിത്രപുരസ്കാരം നേടി. സിഐഡി മൂസയിലെ വില്ലൻ വേഷത്തിലൂടെ മലയാളികളുടെ ഇടയിലും ശ്രദ്ധേയനായി.
അറുപതാം വയസിൽ വീണ്ടും മാംഗല്യം; ആശിഷ് വിദ്യാർഥി വിവാഹിതനായി
08:53 AM May 26, 2023 | Deepika.com