അരനൂറ്റാണ്ടോളംനീണ്ട അഭിനയജീവിതം രജനീകാന്ത് അവസാനിപ്പിക്കാൻ ഒരുങ്ങുകയാണെന്ന് റിപ്പോർട്ടുകൾ. ഓഗസ്റ്റിൽ പ്രദർശനത്തിനെത്തുന്ന ‘ജയിലർ’ കൂടാതെ രണ്ടുചിത്രങ്ങളിൽ കൂടി അഭിനയിച്ചശേഷം സിനിമയോട് വിടപറയുമെന്നാണ് സൂചന.
തമിഴ് മാധ്യമം ഇന്ത്യ ഗ്ലിറ്റ്സാണ് വാർത്ത റിപ്പോർട്ട് ചെയ്തിരിക്കുന്നത്. ജയ് ഭീം സംവിധാനംചെയ്ത ടി.ജെ. ജ്ഞാനവേലിന്റെ പുതിയ ചിത്രത്തിൽ രജനികാന്താണ് നായകൻ. അതിനുശേഷം ലോകേഷ് കനകരാജ് സംവിധാനംചെയ്യുന്ന ചിത്രമുണ്ടാകും. ഇതോടെ അഭിനയം നിർത്താനാണ് തീരുമാനം.
ലോകേഷിന്റെ ചിത്രത്തിൽ രജനി അഭിനയിക്കുന്നതിന് ധാരണയായെന്നും അത് അദ്ദേഹത്തിന്റെ അവസാന ചിത്രമായിരിക്കുമെന്ന് പറയപ്പെടുന്നതായും ഓൺലൈൻ മാധ്യമത്തിന് നൽകിയ അഭിമുഖത്തിൽ സംവിധായകനും നടനുമായ മിഷ്കിൻ പറഞ്ഞു.
കെ. ബാലചന്ദർ സംവിധാനം ചെയ്ത ‘അപൂർവ രാഗങ്ങൾ’(1975) ആണ് രജനീകാന്തിന്റെ ആദ്യ ചിത്രം. റിലീസിനൊരുങ്ങുന്ന ജയിലർ കരിയറിലെ 169-ാമത്തെ ചിത്രമാണ്.
അഭിനയം നിർത്താനൊരുങ്ങി രജനീകാന്ത്? അവസാന ചിത്രം ഒരുക്കുക ലോകേഷ് കനകരാജ്
12:35 PM May 19, 2023 | Deepika.com