പൊതുചടങ്ങിനിടെ സീരിയൽ നടിമാരെ കുറിച്ച് മോശം പരാമർശം നടത്തിയ രാഷ്ട്രീയ നേതാവിന് അതേ വേദിയിൽ മറുപടി നൽകി സിനിമ-സീരിയൽ താരം മഞ്ജു പത്രോസ്.
പെരുമ്പിലാവില് വെച്ച് നന്ന കുടുംബശ്രീ സിഡിഎസ് രജത ജൂബിലി ആഘോഷ പരിപാടിയുടെ വേദിയിലാണ് മഞ്ജുവിന്റെ മറുപടി. സിപിഎം തൃശൂർ ജില്ലാ കമ്മിറ്റി അംഗം ബാലാജിയാണ് സീരിയൽ നടിമാരെ കുറിച്ച് പരാമർശം നടത്തിയത്.
താരം സംസാരിക്കുന്നതിന്റെ വീഡിയോ സീരിയൽ നടൻ സാജൻ സൂര്യ സമൂഹമാധ്യമത്തിലൂടെ പങ്കുവച്ചത് വൈറലായി.
മഞ്ജുവിന്റെ മറുപടി
സീരിയില് നടികള് വരുന്നത് എനിക്കിഷ്ടമല്ല. ഞാൻ അങ്ങനെയുള്ള പരിപാടികള് കാണാറില്ല. സാറിന് ഞങ്ങളെ ഇഷ്ടമല്ലാത്തത് അഭിനയിക്കുന്നത് കൊണ്ടാണോ, അതോ സാര് കാണാഞ്ഞിട്ടാണോ എന്ന് അറിയില്ല.
എന്തായാലും ഇതൊരു തൊഴില് മേഖലയലാണ്. അത്ര ഈസിയല്ല ഒരു മേഖലയിലും മുമ്പില് എത്താൻ. എനിക്ക് കൃഷി ഇഷ്ടമല്ല. അതുകൊണ്ട് ഒരു കര്ഷകൻ വേദിയില് ഇരിക്കുന്നത് ഇഷ്ടമല്ലെന്ന് പറയുന്നതിന്റെ വൈരുദ്ധ്യത സാര് ആലോചിച്ചാല് കൊള്ളാം എന്നും മഞ്ജു പത്രോസ് വ്യക്തമാക്കി.
നടൻ സാജൻ സൂര്യ വീഡിയോ പങ്കുവച്ച് കൊണ്ട് കുറിച്ചത്
പെരുമ്പിലാവിൽ നടന്ന ഒരു പൊതു പരിപാടിയിൽ സിനിമ സീരിയൽ നടി മഞ്ജു പത്രോസിനെ വേദിയിൽ ഇരുത്തിക്കൊണ്ട് സീരിയൽ നടികളെ ഇകഴ്ത്തുന്ന പരാമർശങ്ങൾ നടത്തുകയും, അവരുടെ സാമീപ്യം പോലും ഇഷ്ടമല്ല എന്നും ഞങ്ങളുടെ തൊഴിൽ രംഗത്തെ പുച്ഛവൽക്കരിക്കുകയും ചെയ്ത പ്രമുഖ പാർട്ടി നേതാവിന് മാന്യമായ മറുപടി വേദനയോടെ ആണെങ്കിൽ കൂടിയും മഞ്ജു പത്രോസ് നൽകി. അഭിനന്ദനങ്ങൾ മഞ്ജു.
പരിപാടിയുടെ പേര് " പെൺവെട്ടം". എന്നിട്ട് പെണ്ണിനെ ഇരുത്തി നൈസായി അപമാനിക്കൽ. ആളെകൂട്ടാൻ ഞങ്ങളെ വേണം. എന്നിട്ട് ഇരുത്തി പറയും സീരിയൽ കാണരുതെന്ന് ചീത്തയായി പോകുമെന്ന്.
ഇപ്പോ നാട്ടുകാര് പറഞ്ഞു തുടങ്ങി നേതാക്കൾ കാരണം ടിവിയിലെ വാർത്തകൾ പോലും കാണാൻ നാണക്കേടാന്ന്. കലികാലം.
സീരിയൽ നടിമാരെ വിമർശിച്ചു; അതേ വേദിയിൽ മറുപടി നൽകി നടി മഞ്ജു പത്രോസ്
10:13 AM May 19, 2023 | Deepika.com