വെള്ളിയാഴ്ച റിലീസായ 2018 എന്ന ചിത്രത്തിന്റെ വിജയം ഫിൻലൻഡിൽ ആഘോഷിച്ച് നടൻ ടൊവീനോ. മാതാപിതാക്കൾക്കും സഹോദരകുടുംബത്തിനും ഒപ്പം ഷാംപെയ്ൻ പൊട്ടിച്ചാണ് താരം വിജയം ആഘോഷിക്കുന്നത്. ഭാര്യ ലിഡിയയെയും മക്കളെയും വീഡിയോയിൽ കാണാം.
കഴിഞ്ഞ കുറച്ചുദിവസങ്ങളായി യൂറോപ്പിൽ അവധി ആഘോഷിക്കുകയാണ് ടൊവീനോയും കുടുംബവും. ഇത്തവണത്തെ യാത്രയിൽ താരത്തിനൊപ്പം മാതാപിതാക്കളും സഹോദരകുടുംബങ്ങളുമുണ്ട്.
ചിത്രത്തിന്റെ വിജയത്തിൽ സന്തോഷം അറിയിക്കാനായി താരം ഫിൻലൻഡിൽ നിന്നും ലൈവിൽ എത്തിയിരുന്നു. ഈ സിനിമ റിലീസ് ചെയ്യുമ്പോൾ നാട്ടിലില്ല എന്നത് തന്റെ കരിയറിനെ സംബന്ധിച്ചടത്തോളം ഏറ്റവും വലിയ നഷ്ടമാണെന്ന് താരം പറഞ്ഞിരുന്നു. ഞായറാഴ്ച തിരികെ കേരളത്തിലെത്തുന്ന താരം കുടുംബസമേതം ചിത്രം കാണാനായി എത്തുമെന്നും പറഞ്ഞിരുന്നു.
‘2018’ സിനിമയിൽ അനൂപ് എന്ന നാട്ടിൻപുറത്തുകാരനായാണ് ടൊവീനോ എത്തുന്നത്. പട്ടാളത്തിൽ നിന്ന് പേടിച്ചോടി എത്തുന്ന അനൂപ് പിന്നീട് നാടിന്റെ യഥാർഥ ഹീറോയായി മാറുകയാണ് ചിത്രത്തിൽ. ഗംഭീരപ്രകടനമാണ് താരം ചിത്രത്തിൽ കാഴ്ച വച്ചിരിക്കുന്നത്.
ഫിൻലൻഡിൽ നിന്നും 2018ന്റെ വിജയം ആഘോഷിച്ച് ടൊവീനോയും കുടുംബവും; വീഡിയോ
12:08 PM May 06, 2023 | Deepika.com