കേരളത്തിലെത്തിയ വന്ദേ ഭാരത് എക്സ്പ്രസിന് ഭാവിയിൽ 130 കിലോ മീറ്റർ വേഗത ഉണ്ടാകുമെന്ന റിപ്പോർട്ട് സത്യമാണെങ്കിൽ താൻ ഇനി മുതൽ ബിജെപിക്ക് വോട്ട് ചെയ്യുമെന്ന് നടൻ ഹരീഷ് പേരടി. ഇനിയും വോട്ട് നശിപ്പിക്കാൻ വയ്യെന്നും ബിജെപിയുടെ താമര ചിഹ്നത്തിൽ വോട്ട് ചെയ്യുമെന്നും പേരടി സമൂഹമാധ്യമത്തിൽ കുറിച്ചു.
എനിക്ക് 53 വയസ്സുകഴിഞ്ഞു...ഒരു കോൺഗ്രസ് കുടുംബത്തിൽ ജനിച്ച ഞാൻ വോട്ടവകാശം കിട്ടിയതു മുതൽ ഇടതുപക്ഷത്തിനാണ് വോട്ട് ചെയ്തത്..പക്ഷേ ഈ വാർത്തയിലെ വേഗത എന്റെ ജീവിതത്തിൽ വന്ദേഭാരത് തീവണ്ടിക്ക് സമ്മാനിക്കാൻ സാധിച്ചാൽ ബിജെപിയുടെ വർഗീയ രാഷ്ട്രിയത്തെ മാറ്റി വെച്ച് ഞാൻ ബിജെപിയുടെ താമര ചിഹ്നത്തിൽ വോട്ട് ചെയ്യും...
ഇല്ലെങ്കിൽ ബിജെപിക്കെതിരെ വിരൽ ചൂണ്ടുകയും ചെയ്യും...കാരണം ഭരണത്തിന്റെ നിറം എന്തായാലും എനിക്കും എന്റെ നാടിനും അഴിമതിയില്ലാത്ത വേഗത വേണം...ഇനിയും എന്റെ വോട്ട് നശിപ്പിക്കാൻ വയ്യാ.. ഹരീഷ് പേരടി കുറിച്ചു.
അതേസമയം ഇന്നു രാവിലെ മുതൽ വന്ദേഭാരത് എക്സ്പ്രസ് പരീക്ഷണ ഓട്ടം തുടങ്ങി. തിരുവനന്തപുരം സ്റ്റേഷനില്നിന്നും കണ്ണൂരിലേക്കാണ് ട്രെയിന് യാത്ര തിരിച്ചത്.
പുലര്ച്ചെ 5.10ന് തിരുവനന്തപുരം സെന്ട്രല് സ്റ്റേഷനില്നിന്ന് പുറപ്പെട്ട ട്രെയിന് 8.28നാണ് എറണാകുളത്തെത്തിയത്. കോട്ടയം സ്റ്റേഷനില് നിര്ത്തിയ ട്രെയിന് 7.30നാണ് ഇവിടെനിന്ന് വീണ്ടും യാത്രയാരംഭിച്ചത്.
മൂന്ന് മണിക്കൂര് 18 മിനിറ്റാണ് ട്രെയിന് തിരുവനന്തപുരത്തുനിന്ന് എറണാകുളത്തെത്താന് എടുത്ത സമയം. കേരളത്തില് ഏറ്റവും വേഗതയേറിയ ട്രെയിന് എന്നറിയപ്പെടുന്ന ജനാശതാബ്ദി എക്സ്പ്രസ് എടുക്കുന്ന അതേ സമയംകൊണ്ടാണ് വന്ദേഭാരത് എറണാകുളം വരെ ഓടിയെത്തിയത്.
തിരുവനന്തപുരത്ത് നിന്ന് ആലപ്പുഴ വഴി വരുന്ന ജനാശതാബ്ദി എക്സ്പ്രസ് മൂന്ന് മണിക്കൂര് 20 മിനിറ്റുകൊണ്ടാണ് സാധാരണ എറണാകുളത്തെത്തുക.
വന്ദേ ഭാരത് എക്സ്പ്രസ് 130 കിലോമീറ്റർ വേഗതയിൽ ഓടിയാൽ ബിജെപിക്ക് വോട്ട് ചെയ്യും: ഹരീഷ് പേരടി
10:30 AM Apr 17, 2023 | Deepika.com