വീര സിംഹ റെഡ്ഡി എന്ന ചിത്രത്തിന്‍റെ പ്രി റിലീസിംഗ് ചടങ്ങിൽ തെലുങ്കിൽ പ്രസംഗിച്ച് കൈയടി നേ‌ടി ഹണി റോസ്. നടിയുടെ തെലുങ്ക് ഉച്ഛാരണം കേട്ട് നടൻ ബാലയ്യ കൈകൂപ്പുന്നതും കാണാം.
നമസ്കാരം പറഞ്ഞു സ്വയം പരിചയപ്പെടുത്തിയാണ് നടി പ്രസംഗം തുടങ്ങുന്നത്. തെലുങ്ക് സിനിമയോട് അത്രയധികം ഇഷ്ടമാണ് എന്നും ഹണി പറയുന്നുണ്ട്. ഏതായാലും വീഡിയോ ആരാധകർ ഏറ്റെടുത്തു കഴിഞ്ഞു.
നന്ദമുരി ബാലകൃഷ്ണ നായകനാകുന്ന ചിത്രം വീര സിംഹ റെഡ്ഡിയുടെ രചനയും സംവിധാനവും നിർവഹിച്ചിരിക്കുന്നത് ഗോപിചന്ദ് മലിനേനിയാണ്. ശ്രുതി ഹാസന്‍ നായികയാവുന്ന ചിത്രത്തില്‍ മലയാളത്തില്‍ നിന്ന് ഹണി റോസും ലാലും പ്രധാന കഥാപാത്രങ്ങളെ അവതരിപ്പിക്കുന്നുണ്ട്. വരലക്ഷ്മി ശരത്കുമാര്‍, ദുനിയ വിജയ്, പി.രവി ശങ്കര്‍, ചന്ദ്രികാ രവി, അജയ് ഘോഷ്, മുരളി ശര്‍മ തുടങ്ങിയവരും താരനിരയിലുണ്ട്.
ചിത്രത്തിന്‍റെ സംഭാഷണങ്ങള്‍ ഒരുക്കിയിരിക്കുന്നത് സായ് മാധവ് ബുറയാണ്. തെലുങ്കിലെ പ്രമുഖ നിർമാണ കമ്പനിയായ മൈത്രി മൂവി മേക്കേഴ്സിന്‍റെ ബാനറില്‍ നവീന്‍ യെര്‍നേനിയും രവി ശങ്കര്‍ യലമന്‍ചിലിയും ചേര്‍ന്നാണ് നിര്‍മാണം.
സംഗീതം തമന്‍ എസ്. ഛായാഗ്രഹണം റിഷി പഞ്ചാബി. എഡിറ്റിംഗ് നവീന്‍ നൂലി. ജനുവരി 12 ന് ചിത്രം തിയറ്ററുകളില്‍ എത്തും.