നടി ഷംന കാസിം അമ്മയാകാൻ ഒരുങ്ങുന്നു. താരം തന്നെയാണ് യുട്യൂബ് ചാനലിലൂടെ സന്തോഷ വാർത്ത പങ്കുവച്ചത്. അച്ഛനും അമ്മയ്ക്കും ബന്ധുക്കൾക്കുമൊപ്പമാണ് താരം പുതിയ വിശേഷം പങ്കുവച്ചത്. എല്ലാവരുടെയും പ്രാർഥനയും അനുഗ്രഹവും ഒപ്പമുണ്ടാകണമെന്നും വിവാഹം മുതൽ തന്ന പിന്തുണ കൂടെ വേണമെന്നും ഷംന പറയുന്നു.
ഇക്കഴിഞ്ഞ ഒക്ടോബറിലായിരുന്നു താരത്തിന്റെ വിവാഹം. ജെബിഎസ് ഗ്രൂപ്പ് കന്പനിയുടെ ഫൗണ്ടറും സിഇഒയുമായ ഷാനിദ് ആസിഫ് അലിയാണ് ഷംനയുടെ ഭർത്താവ്. താരത്തിന്റെ വിവാഹചിത്രങ്ങളെല്ലാം തന്നെ സമൂഹമാധ്യമങ്ങളിൽ വൈറലായിരുന്നു.
മഞ്ഞു പോലൊരു പെൺകുട്ടി എന്ന ചിത്രത്തിലൂടെ 2004ലായിരുന്നു ഷംന സിനിമലോകത്തേക്ക് എത്തിയത്. പിന്നീട് തമിഴ്, തെലുങ്ക് സിനിമകളിൽ തന്റേതായ സാന്നിധ്യം ഉറപ്പിച്ചു. ഇപ്പോൾ തെലുങ്ക്, തമിഴ്, കന്നഡ സിനിമകളിൽ സജീവമാണ് താരം. ജോസഫ് സിനിമയുടെ തമിഴ് റീമേക്കായ വിസിത്തിരനിലാണ് നടി അവസാനം പ്രത്യക്ഷപ്പെട്ടത്.