ഷാജി കൈലാസ് സംവിധാനം ചെയ്യുന്ന കാപ്പ എന്ന ചിത്രത്തിന്റെ പ്രമോഷൻ പരിപാടികൾക്കിടയിൽ പൊട്ടിച്ചിരി വിടർത്തി ശ്രീനിവാസൻ. മലയാളത്തിലെ ഏറ്റവും മികച്ച തിരക്കഥാകൃത്ത് താനാണെന്നും കുറേകാലം കൂടിയാണ് പലരെയും കാണുന്നതെന്നും നേരില് കാണാത്തതുകൊണ്ടാണ് പലരും അഭിനയിക്കാന് വിളിക്കാത്തതെന്നും അദ്ദേഹം നർമരൂപേണേ പറഞ്ഞു.
കുറേക്കാലമായി മൂടിവച്ച ഒരു സത്യം ഞാൻ പറയുകയാണ്. മലയാള സിനിമയിലെ ഏറ്റവും വലിയ തിരക്കഥാകൃത്ത് ഞാൻ തന്നെയാണ്. ഏറ്റവും കൂടുതൽ സൂപ്പർ ഹിറ്റുകൾ എഴുതിയതും ഞാൻ തന്നെയാണ്. ഏറ്റവും കൂടുതൽ തിരക്കഥകൾ എഴുതിയതും ഞാൻ തന്നെയാണ്.
എന്നെ ഞാൻ കൂടുതലൊന്നും പുകഴ്ത്തി പറഞ്ഞില്ലല്ലോ അല്ലേ. ശരിക്കും പറഞ്ഞാൽ അത്യാവശ്യം നല്ല കുറച്ചാളുകൾ ഉള്ളതുകൊണ്ടാണ് എന്നെ ഇവിടേക്ക് വിളിച്ചത്. ഇതൊക്കെ അവരുടെ കാരുണ്യമാണ്. ഞാൻ കുറച്ചുനാളായിട്ട് അഭിനയിക്കാറില്ല. ഫാസിലിനെ കണ്ടപ്പോൾ എനിക്ക് വലിയ സന്തോഷമായി.
എന്നെ കാണാത്തതുകൊണ്ടാണോ അദ്ദേഹം എന്നെ വച്ച് സിനിമ എടുക്കാത്തതെന്ന് എനിക്ക് സംശയമുണ്ടായിരുന്നു. ഞാനിപ്പോൾ സംഭാഷണമൊക്കെ പറയാൻ തുടങ്ങി. ഒരു സിനിമ എടുക്കുന്പോൾ അഭിനയിക്കണമെന്നുണ്ട്.
അടുത്ത സിനിമയിൽ ഞാൻ എന്തായാലും അഭിനയിക്കും. ഒരുപാട് ആളുകളെ കുറെക്കാലത്തിന് ശേഷം കാണാൻ സാധിച്ചു. ഇന്നത്തെ ദിവസത്തിന്റെ പ്രത്യേകതയും അതുതന്നെയാണ്.