റോഷാക്ക് സിനിമയുടെ വിജയാഘോഷത്തിനിടയിൽ ആസിഫ് അലിയെ ഞെട്ടിച്ച് മമ്മൂട്ടി. താരം വേദിയിലെത്തിയതിന് തൊട്ടു പിന്നാലെ വേദിയിലെത്തിയ മമ്മൂട്ടി മൈക്ക് വാങ്ങി സമ്മാനം നൽകുകയായിരുന്നു. ആദ്യം വേദിയിലെത്തിയ ആസിഫിന് ദുൽഖർ റോഷാക്കിന്‍റെ ഉപഹാരം നൽകി.
എന്‍റെ രണ്ടു കണ്ണുകൾ വച്ച് മലയാളികൾ എന്നെ തിരിച്ചറിയുന്ന നിലയിലേക്ക് എത്തി. അതിൽ ഒത്തിരി സന്തോഷം. ചിത്രത്തിന്‍റെ പ്രെമോഷനുകൾക്കിടയിൽ മമ്മൂക്ക എന്നെക്കുറിച്ച് ഒരുപാട് കാര്യങ്ങൾ പറഞ്ഞു. അത്തരം വലിയ വലിയ സന്തോഷമാണ് എനിക്ക് ഏറ്റവും വലിയ അംഗീകാരമെന്ന് ആസിഫ് പറഞ്ഞു നിർത്തിയതിന് പിന്നാലെയാണ് മൈക്ക് വാങ്ങി മമ്മൂട്ടി സമ്മാന പ്രഖ്യാപനം നടത്തുകയായിരുന്നു.
‘‘കമൽഹാസൻ സൂര്യയ്ക്ക് റോളക്സ് വാച്ച് നൽകിയ വാർത്ത കണ്ടിരുന്നു. ആ പടത്തിന് 500 കോടിയാണ് കളക്‌ഷൻ കിട്ടിയത്. അതിൽനിന്നു അഞ്ചോ പത്തോ ലക്ഷം കൊടുത്ത് ഒരു വാച്ച് മേടിച്ചു കൊടുത്തു.
ഞാൻ ചുമ്മാ പറഞ്ഞതാണ് കേട്ടോ. ഭയങ്കര വിലയാകും ആ വാച്ചിന്. ആസിഫ് എന്നോട് ചോദിച്ചത് റോളക്സ് വാച്ച് വാങ്ങിച്ചു തരുമോ എന്നാണ്.. റോളക്സ്.’’– മമ്മൂട്ടിയുടെ വാക്കുകൾക്കു പിന്നാലെ വേദിയിലേക്ക് റോളക്സ് വാച്ച് എത്തുകയായിരുന്നു. ആസിഫ് അലിക്ക് അപ്രതീക്ഷിതമായിരുന്നു അത്.
ഞെട്ടിത്തരിച്ച് മുന്നോട്ട് നീങ്ങിയ ആസിഫ് അലിയെയാണ് വീഡിയോയിൽ കാണാൻ സാധിക്കുന്നത്. നിറചിരിയോടെ മമ്മൂട്ടിയും ദുൽഖറും അടുത്തു നിന്നു. റോളക്സ് വാച്ച് കൈമാറി രണ്ടുപേരുടെയും ആലിംഗനം.
വേദിയിൽ നിന്നും ആഹ്ളാദത്തോടെ ഇറങ്ങിയ ആസിഫിനോട് എന്തെങ്കിലും പറയാനുണ്ടോയെന്ന് അവതാരിക ചോദിച്ചു. സന്തോഷ നിമിഷങ്ങൾക്കിടയിലൂടെ ആസിഫ് ഒന്നുമില്ലെന്ന് ആംഗ്യം കാണിച്ച് ഇറങ്ങി.