നാളുകൾക്കു ശേഷം വീണ്ടും പഴയ ഊർജസ്വലതയോടും കളിചിരിയോടും വിവാഹവേദിയിലെത്തിയ ശ്രീനിവാസനിലേക്കായിരുന്നു എല്ലാ ക്യാമറക്കണ്ണുകളും പോയത്. നിർമാതാവ് വിശാഖ് സുബ്രഹ്മണ്യത്തിന്റെ വിവാഹത്തിൽ പങ്കെടുക്കാൻ തിരുവനന്തപുരത്തെത്തിയ താരം എല്ലാവരുമായി സൗഹൃദം പങ്കിട്ടു.
ഭാര്യ വിമലക്കും മകൻ വിനീതിനുമൊപ്പമാണ് അദ്ദേഹം വിവാഹവേദിയിലെത്തിയത്. വിവാഹസദസിന്റെ മുൻനിരയിൽ മോഹൻലാലിനൊപ്പം അദ്ദേഹം ഇരുന്നു. നിർമാതാവ് സുരേഷ് കുമാറിനും മോഹൻലാലിനുമൊപ്പം നർമം പങ്കിട്ട് ചിരിച്ചുല്ലസിക്കുന്ന ശ്രീനിവാസന്റെ വീഡിയോ ഇപ്പോൾ വൈറലാണ്.
ചിരിച്ച മുഖത്തോടെ അവശതകളെ മറന്നുള്ള ശ്രീനിവാസന്റെ ചിത്രങ്ങളായിരുന്നു വിവാഹവേദിയിൽ ഏറ്റവും സുന്ദരമായി തോന്നിയത്. ശേഷം ദന്പതികൾക്കൊപ്പം വിവാഹവേദിയിലെത്തി ചിത്രവുമെടുത്താണ് ഇവർ മടങ്ങിയത്.