ദ വണ്ടർ ബിഗിൻസ് എന്ന അടിക്കുറിപ്പോടെ നടി പാർവതി തിരുവോത്ത് പങ്കുവച്ച ചിത്രം കണ്ട് യഥാർഥത്തിൽ വണ്ടറടിച്ചത് ആരാധകരാണ്. പോസീറ്റിവായ പ്രെഗ്നൻസി കിറ്റിന്റെ ചിത്രമാണ് താരം പങ്കുവച്ചത്.
ചിത്രം പങ്കുവച്ച് നിമിഷങ്ങൾക്കുള്ളിൽ ആശംസകളുടെ പെരുമഴയുമെത്തി. എന്നാൽ തൊട്ടുപിന്നാലെ ഗായിക സയനോര, നിത്യ മേനോൻ തുടങ്ങിയവരും ചിത്രം പങ്കുവച്ചതോടെയാണ് എന്താണ് സംഭവം എന്നറിയാനുള്ള ആകാംക്ഷയിലേക്ക് എല്ലാവരുമെത്തിയത്.
എന്നാല് ഇതൊരു സിനിമയുടെ പ്രമോഷന്റെ ഭാഗമായിട്ടാണെന്നാണ് സൂചന. സോണി ലിവിനു വേണ്ടി അഞ്ജലി മേനോൻ സംവിധാനം ചെയ്യുന്ന പുതിയ ചിത്രത്തിനു വേണ്ടിയാണ് ഈ ‘പ്രഗ്നൻസി ടെസ്റ്റ്’ചിത്രം ഇവർ പങ്കുവച്ചത്.
നാദിയ മൊയ്ദു, പാർവതി തിരുവോത്ത്, നിത്യ മേനൻ, പത്മപ്രിയ, അർച്ചന പദ്മിനി എന്നിവർ സിനിമയിൽ ഗർഭിണികളായാണ് വേഷമിടുക എന്നാണ് സൂചനകൾ. ഗായിക സയനോരയും സിനിമയിൽ അഭിനയിക്കുന്നുണ്ട്.
വണ്ടർ വുമൺ എന്നാണ് ചിത്രത്തിന്റെ പേരെന്നും സൂചനകളുണ്ട്. എന്നാൽ ചിത്രത്തെ സംബന്ധിച്ച ഔദ്യോഗിക സ്ഥിരീകരണങ്ങൾ ഒന്നും തന്നെ വന്നിട്ടില്ല. എന്തായാലും താരങ്ങളുടെ പോസ്റ്റുകള് സമൂഹമാധ്യമങ്ങളില് വൈറലായിക്കഴിഞ്ഞു.
പ്രഗ്നൻസി ടെസ്റ്റ് പോസിറ്റീവായ ചിത്രവുമായി പാർവതി; വണ്ടറടിച്ച് ആരാധകർ
03:45 PM Oct 28, 2022 | Deepika.com