നടന് ബാലയുടെ രസകരമായ ഓര്മ പങ്കുവച്ച ടിനി ടോമിന്റെയും രമേഷ് പിഷാരടിയുടെയും വീഡിയോ സമൂഹമാധ്യമങ്ങളില് വൈറലായിരുന്നു. ബാലയുടെ ശൈലിയില് ടിനി ടോം അവതരിപ്പിച്ച കാര്യങ്ങള് ട്രോളന്മാര് ആഘോഷിക്കുകയും ചെയ്തു.
ഇപ്പോള് വിഷയത്തില് ആദ്യമായി പ്രതികരിച്ചിരിക്കുകയാണ് താരം. വൈറലായ സംഭവത്തില് താന് അത്രയ്ക്ക് സന്തുഷ്ടനല്ലെന്ന് ബാല പറഞ്ഞു. നേരില് കണ്ടാല് ടിനി ടോമിനെ കൊല്ലാനുള്ള ദേഷ്യമുണ്ടെന്നും താരം ടിവി ചാനലിന് നല്കിയ അഭിമുഖത്തില് പറഞ്ഞു.
‘‘എനിക്ക് അത്ര സന്തോഷമൊന്നുമില്ല. ശരിക്കും നേരിട്ട് കണ്ടാല് നിങ്ങളെ കൊല്ലാനുള്ള ദേഷ്യമുണ്ട്. എയര്പോര്ട്ട് മുതല് എല്ലായിടത്തും ആളുകള് ലൈം ടീയെ കുറിച്ചാണ് സംസാരിക്കുന്നത്. കത്തി എടുത്ത് കുത്തിയിട്ട് ടിനി ഇപ്പോള് ട്രീറ്റ്മെന്റ് ചെയ്യുകയാണ്. ടിനി എന്നെ വിളിച്ചു. അപ്പോൾ ഞാന് ഭയങ്കര ദേഷ്യത്തിലായിരുന്നു.
ടിനിയേക്കാള് എനിക്ക് ദേഷ്യം തോന്നുന്നത് രമേഷ് പിഷാരടിയോടാണ്. എനിക്ക് അറിയാം കോമഡിക്ക് വേണ്ടി നിങ്ങള് കള്ളത്തരം പറയുകയാണെന്ന്. അപ്പോള് പിഷാരടി സത്യമെന്ന പോലെ ഒരു റിയാക്ഷൻ കൊടുക്കുന്നുണ്ട്. ആരെ ആദ്യം കൊല്ലണം എന്ന സംശയമുണ്ട്.
ടിനി പറഞ്ഞത് എനിക്ക് ഒട്ടും ഇഷ്ടമായില്ല. സൈബര് ആക്രമണം ഏറ്റവും കൂടുതൽ നടത്തുന്നത് എന്റെ മേലാണ്. ഇവിടെ ഇരുന്നു കാണുമ്പോള് ചിലപ്പോള് നിങ്ങൾക്ക് മനസിലാകില്ല. സത്യത്തില് എല്ലാവര്ക്കും സൈബര് അറ്റാക്ക് കിട്ടുന്നുണ്ട്. എന്തായാലും ഈ ഓണം ചെന്നൈയില് തന്നെ നില്ക്കാനാണ് ഞാന് തീരുമാനിച്ചത്.
ഇപ്പോള് ഞാന് ഫെയ്സ്ബുക്കില് എല്ലാവര്ക്കും എന്റെ ഹൃദയം നിറഞ്ഞ ഓണാശംസകള് എന്ന് പറഞ്ഞാല് എനിക്ക് തിരിച്ചുകിട്ടാന് പോകുന്നത്, നാൻ പൃഥ്വിരാജ്, അനൂപ് മേനോന്, ഉണ്ണി മുകുന്ദന്, ലൈം ടീ’ എന്നായിരിക്കും.
അതിനേക്കാളും നല്ലത് ഞാന് ചെന്നൈയിലായിരിക്കുന്നതാണ്. എന്റെ ഓണം നശിപ്പിച്ച ടിനി ടോമിന് വളരെ വളരെ നന്ദി. ഞാന് അടുത്ത കൊല്ലം ടിനി ചെയ്തത് പോലെ പോലെ മിമിക്രി കാണിച്ച് നിങ്ങളുടെ ഓണം ഞാന് കുളമാക്കും.’’–ബാല പറഞ്ഞു.
ടിനിയെ കണ്ടാല് കൊല്ലാനുള്ള ദേഷ്യമുണ്ട്, അതിലും ദേഷ്യം പിഷാരടിയോട്: ബാല പറയുന്നു
11:01 AM Sep 05, 2022 | Deepika.com