ഷാജി കൈലാസ് സംവിധാനം ചെയ്യുന്ന പുതിയ ചിത്രം കാപ്പയിലെ സംഘടനരംഗങ്ങളുടെ മേക്കിംഗ് വീഡിയോ പുറത്തുവന്നു. പൃഥ്വിരാജ് തന്നെയാണ് തന്റെ ഫേസ്ബുക്ക് പേജിലൂടെ ചിത്രീകരണ രംഗങ്ങള് പങ്കുവച്ചത്. ആക്ഷന് മാസ് രംഗങ്ങളാണ് വീഡിയോയിലുള്ളത്. കൊട്ട മധുവായി വ്യത്യസ്ത ഗറ്റപ്പിലാണ് താരം എത്തുന്നത്.
ജി.ആർ. ഇന്ദുഗോപൻ തിരക്കഥ ഒരുക്കുന്ന ചിത്രം നിർമ്മിക്കുന്നത് ജിനു വി. ഏബ്രഹാം, ഡോൾവിൻ കുര്യാക്കോസ്, ദിലീഷ് നായർ എന്നിവർ ചേർന്നാണ്. തീയറ്റർ ഓഫ് ഡ്രീംസ് എന്ന ഇവരുടെ ബാനറിന് ഫെഫ്ക റൈറ്റേഴ്സ് യൂണിയൻ നിർമ്മാണ പിന്തുണ നൽകുന്നു.
ഇന്ദുഗോപന്റെ "ശംഖുമുഖി' എന്ന നോവലിന്റെ ചലച്ചിത്രാവിഷ്കാരമാണ് കാപ്പ. തലസ്ഥാന നഗരത്തിലെ ഗുണ്ടാസംഘങ്ങളുടെ കഥ പറയുന്ന ചിത്രം വൻ ബജറ്റിലാണ് ഒരുങ്ങുന്നത്. പൃഥ്വിരാജിനൊപ്പം അപർണ്ണ ബാലമുരളി, ആസിഫ് അലി,അന്ന ബെൻ, നന്ദു,ജഗദീഷ്,ദിലീഷ് പോത്തൻ എന്നിവരും പ്രധാന വേഷത്തിലെത്തും.
മഞ്ജു വാര്യറായിരുന്നു ആദ്യം ചിത്രത്തിൽ ഉണ്ടായിരുന്നത്. എന്നാൽ താരത്തിന്റെ തിരക്ക് മൂലം ചിത്രത്തിൽ നിന്നും പിൻമാറുകയായിരുന്നു. പിന്നീടാണ് അപർണ്ണ ബാലമുരളി എത്തുന്നത്. ജോമോൻ ടി. ജോണ് ഛായാഗ്രഹണം നിർവഹിക്കുന്ന ചിത്രത്തിന്റെ എഡിറ്റർ ഷമീർ മുഹമ്മദാണ്.
കൊട്ട മധുവായി തകര്ത്തഭിനയിച്ച് പൃഥ്വിരാജ്; കാപ്പ മേക്കിംഗ് വീഡിയോ
12:26 PM Jul 27, 2022 | Deepika.com