ഇടതുമുന്നണിയുടെ ഉപതെരഞ്ഞെടുപ്പ് വിജയം നടന് വിനായകനൊപ്പം ആഘോഷിച്ചെന്ന വാര്ത്തകള് തള്ളി നടന് ജോജു ജോര്ജ്. ഇങ്ങനെയൊരു തെരഞ്ഞെടുപ്പ് നടന്ന കാര്യം പോലും താന് അറിഞ്ഞിട്ടില്ലെന്നും അടുത്ത സുഹൃത്തായ വിനായകനെ കണ്ടപ്പോള് അദ്ദേഹത്തോടൊപ്പം കുറച്ചുനേരം ഇലത്താളം കൊട്ടുക മാത്രമാണ് താന് ചെയ്തതെന്ന് ജോജു പറഞ്ഞു. അല്ലാതെ താനൊരു ജാഥയും നയിച്ചിട്ടില്ല. ആവശ്യമില്ലാതെ ഓരോ കാര്യങ്ങളിലേക്ക് തന്നെ തള്ളിയിടുകയാണ്.
വിഷയത്തില് കൂടി ഇനിയും ശത്രുക്കളെ ഉണ്ടാക്കാന് താല്പര്യമില്ലെന്നും ജോജു വ്യക്തമാക്കി. ഷൂട്ട് നടന്നുകൊണ്ടിരിക്കുമ്പോള് അടുത്ത സുഹൃത്തായ വിനായകനെ കണ്ടപ്പോള് ഞാന് ചെന്നു. ഇലത്താളം വാങ്ങി കൊട്ടി. ഒരുമിനിറ്റോളം ഞങ്ങള് തമ്മില് സംസാരിച്ചു. അല്ലാതെ ഞാനൊരു ജാഥയും നയിച്ചു കൊണ്ടു പോയിട്ടില്ല. ഉപതെരഞ്ഞെടുപ്പ് നടന്ന കാര്യം പോലും എനിക്കറിയില്ല.
കൊച്ചി കോര്പ്പറേഷന് 63-ാം ഡിവിഷന് ഗാന്ധിനഗറില് സിപിഐഎമ്മിന്റെ ബിന്ദു ശിവന് വിജയിച്ചതിന് പിന്നാലെ നടത്തിയ ആഹ്ലാദപ്രകടനത്തിലാണ് ഇടതുമുന്നണി പ്രവര്ത്തകര്ക്കൊപ്പം വിനായകനും ചേര്ന്നത്. പ്രകടനം എറണാകുളം കെഎസ്ആര്ടിസി ബസ് സ്റ്റാന്ഡ് പരിസരത്ത് എത്തിയപ്പോഴാണ് വിനായകനും ജോജുവും കണ്ടുമുട്ടിയത്.
"തെരഞ്ഞെടുപ്പ് നടന്ന കാര്യം പോലും അറിയില്ല; സുഹൃത്തിനെ കണ്ടപ്പോള് ഞാന് ചെന്നു'
08:46 PM Dec 08, 2021 | Deepika.com