പെരിന്തൽമണ്ണ: പെരിന്തൽമണ്ണ സായി സ്നേഹതീരത്തിലെ ആദിവാസി കുട്ടികൾക്കായി ലോക ആയുർവേദ ദിനത്തോടനുബന്ധിച്ചു ക്യാന്പ് നടത്തി. പെരിന്തൽമണ്ണ അമൃതം ആയൂർവേദാശുപത്രി ചീഫ് ഫിസിഷ്യൻ ഡോ.പി.കൃഷ്ണദാസ്, ഡോ. ഷീബാ കൃഷ്ണാദാസ്, ഡോ. ശാലി രാജീവ് എന്നിവരുടെ നേതൃത്വത്തിൽ രാവിലെ മുഴുവൻ ആണ്കുട്ടികളെയും ബലാശ്വഗന്ധാദിതൈലം പുരട്ടി ചെറുവ്യായാമം ചെയ്യിച്ചാണ് ആയൂർവേദ ദിനം ആരംഭിച്ചത്. പിന്നീട് സമീപത്തെ കുളത്തിൽ നീന്തി കുളിച്ച ശേഷം കുട്ടികളെ പരിശോധിച്ചു മരുന്നുകൾ വിതരണം ചെയ്തു. തുടർന്നു അതിഥികളും കുട്ടികളും ഒരുമിച്ചു പ്രഭാത ഭക്ഷണവും കഴിച്ചു. താഴെക്കോട് ആദിവാസി കോളനിയിൽ തളർച്ച ബാധിച്ചു അവശനായ മൂപ്പൻ കുമാരൻ ചികിത്സ തേടി അമൃതം ആയൂർവേദാശുപത്രിയിലെത്തിയിരുന്നു.കുറഞ്ഞ ദിവസം കൊണ്ടു സുഖം പ്രാപിച്ചു വരുന്ന മൂപ്പനെ തന്റെ പേരക്കുട്ടികൾ താമസിക്കുന്ന സായി സ്നേഹതീരത്തിൽ നടന്ന ചടങ്ങിൽ പങ്കെടുപ്പിച്ചതു ശ്രദ്ധേയമായി. സിനിമ, സീരിയിൽ നടി ഡോ. ജാനറ്റ് ബിജു ആയൂർവേദദിനം ഉദ്ഘാടനം ചെയ്തു. സായി സ്നേഹതീരം വൈസ്പ്രസിഡന്റ് കെ.ആർ രവി അധ്യക്ഷനായിരുന്നു. ഇ.വി സദാശിവൻ, കുറ്റീരി മാനുപ്പ, റിട്ടയേർഡ് എഇഒ വി.എം ഇന്ദിര, എ. കൃഷ്ണദാസ് സൈജിൽ, അബ്ദുൾ ലത്തീഫ്, ക്യാപ്റ്റൻ ഉണ്ണികൃഷ്ണ, ഡോ. ഷീബാ കൃഷ്ണദാസ്, ഡോ. ശാലിരാജീവ് എന്നിവർ പ്രസംഗിച്ചു. ഡോ. പി.കൃഷ്ണദാസ് സ്വാഗതവും കെ.എസ് ഗോപാലകൃഷ്ണൻ നന്ദിയും പറഞ്ഞു.