പ്രണവ് മോഹന്ലാലിനെ നായകനാക്കി വിനീത് ശ്രീനിവാസന് സംവിധാനം ചെയ്യുന്ന 'ഹൃദയ'ത്തിലെ ഓഡിയോ കാസറ്റുകളുടെ സാംപിള് എത്തി. റെക്കോര്ഡ് ചെയ്ത് പരിശോധിച്ചെന്നും മാസ്റ്റര് ചെയ്ത ട്രാക്കുകള് ജപ്പാനിലെ കാസറ്റ് നിര്മ്മാതാക്കള്ക്ക് അയച്ചുകൊടുത്തെന്നും വിനീത് പറയുന്നു.
"കാസറ്റുകളുടെ പ്രീ-ഓര്ഡര് ഉടന് ആരംഭിക്കും. ഇന്ത്യയില് ഒരു പതിറ്റാണ്ടിനുശേഷമാണ് ഇത് വീണ്ടും നടക്കുന്നത്. ഒരുപാട് നാളായുണ്ടായിരുന്ന സ്വപ്നമാണ് യാഥാര്ഥ്യത്തിലേക്ക് അടുക്കുന്നത്", സാംപിള് കാസറ്റിന്റെ ചിത്രത്തിനും വീഡിയോയ്ക്കുമൊപ്പം വിനീത് സോഷ്യല് മീഡിയയില് കുറിച്ചു.
'ഹൃദയ'ത്തിലെ പുറത്തെത്തിയ ആദ്യ ഗാനം ഇപ്പോഴും ഹിറ്റ് ചാര്ട്ടുകളിലുണ്ട്. അഞ്ച് ദിവസം കൊണ്ട് 74 ലക്ഷത്തോളം കാഴ്ചകളാണ് യുട്യൂബില് ഈ വീഡിയോ ഗാനത്തിന് ലഭിച്ചിരിക്കുന്നത്. ചിത്രത്തില് ആകെ 15 ഗാനങ്ങളാണ് ഉള്ളതെന്ന് വിനീത് നേരത്തെ അറിയിച്ചിരുന്നു.
പാട്ടുകള് ഓഡിയോ കാസറ്റുകളായും ഓഡിയോ സിഡികളായും പുറത്തിറക്കുമെന്നു വിനീത് പറഞ്ഞിരുന്നു. ഹിഷാം അബ്ദുള് വഹാബ് ആണ് 'ഹൃദയ'ത്തിന്റെ സംഗീത സംവിധായകന്. പ്രണവ് നായകനാവുന്ന ചിത്രത്തില് ദര്ശന രാജേന്ദ്രൻ, കല്യാണി പ്രിയദര്ശന് എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു. മെറിലാന്ഡ് സിനിമാസിന്റെ ബാനറില് വിശാഖ് സുബ്രഹ്മണ്യമാണ് ചിത്രം നിര്മ്മിക്കുന്നത്.
എത്തി, എത്തി, സാംപിള് എത്തി; സന്തോഷം പങ്കുവച്ച് വിനീത് ശ്രീനിവാസൻ
02:49 PM Oct 31, 2021 | Deepika.com