പെരിന്തൽമണ്ണ: ദീർഘകാല രോഗങ്ങളുള്ള കുട്ടികൾക്കു താങ്ങും തുണയുമായി പെരിന്തൽമണ്ണയിൽ ’സൊലസ്’ യൂണിറ്റ് ആരംഭിച്ചു. എഴുത്തുകാരൻ കെ.പി രാമനുണ്ണി ഉദ്ഘാടനം ചെയ്തു. അസുഖമുള്ള കുഞ്ഞു മാതാപിതാക്കളുടെ ഒറ്റപ്പെട്ട കണ്ണികളല്ല, അവരെ സഹായിക്കാൻ താങ്ങും തണലുമായി സൊലസ് വോളണ്ടിയർമാർ പ്രവത്തിക്കമെന്നു ഉദ്ഘാടന പ്രസംഗത്തിൽ അദ്ദേഹം പറഞ്ഞു. 2007- ൽ തൃശൂർ ആസ്ഥാനമായി രൂപം കൊണ്ട ഈ സംഘടനയുടെ മലപ്പുറം ജില്ലയിലെ രണ്ടാമത്തെ യൂണിറ്റാണ് പെരിന്തൽമണ്ണയിലേത്. കഴിഞ്ഞ 11 വർഷത്തിനിടയിൽ 1600 ലേറെ കുട്ടികളെ ഇപ്രകാരം മരുന്നും സാന്പത്തിക സഹായവും നൽകി സംരക്ഷിച്ചുവരുന്നുണ്ടെന്നു ഇതിന്‍റെ സ്ഥാപകകൂടിയായ ഷീബഅമീർ അധ്യക്ഷ പ്രസംഗത്തിൽ പറഞ്ഞു. ചടങ്ങിൽ മഞ്ഞളാംകുഴി അലി എംഎൽഎ മുഖ്യാതിഥിയായിരുന്നു. പെരിന്തൽമണ്ണ നഗരസഭാ ചെയർമാൻ എം. മുഹമ്മദ്സലീം സന്ദേശം നൽകി. ഐഎംഎ പ്രസിഡന്‍റ് ഡോ. കെ.എ. സീതി, ഡോ. വിശാലാക്ഷി, ചമയംബാപ്പു, കെ. സുബ്രമണ്യൻ എന്നിവർ പ്രസംഗിച്ചു. ജില്ലാ കണ്‍വീനർ ഡോ. മുംതസ് സ്വാഗതവും ഡോ. അബൂബക്കർ തയ്യിൽ നന്ദിയും പറഞ്ഞു.
