വെള്ളം എന്ന ഹിറ്റ് ചിത്രത്തിന് ശേഷം ജി. പ്രജേഷ്സെൻ സംവിധാനം ചെയ്യുന്ന പുതിയ ചിത്രത്തിൽ ജയസൂര്യയും മഞ്ജു വാര്യരും പ്രധാനവേഷങ്ങളിലെത്തുന്നു. "മേരി ആവാസ് സുനോ' എന്നു പേരിട്ടിരിക്കുന്ന ചിത്രം ഒരു റേഡിയോ ജോക്കിയുടെ കഥയാണ് പറയുന്നത്. ശിവദയാണ് ചിത്രത്തിലെ മറ്റൊരു നായിക.
ലോക റേഡിയോ ദിനമായ ഇന്ന് സിനിമയുടെ ടൈറ്റിൽ പോസ്റ്റർ പുറത്തുവിട്ടു. ജോണി ആന്റണി, സുധീർ കരമന തുടങ്ങിയവരും ചിത്രത്തിൽ വേഷമിടുന്നു. തിരുവനന്തപുരത്തും മുംബൈയിലും കാഷ്മീരിലുമായാണ് ചിത്രീകരണം. ബി.കെ. ഹരി നാരായണന്റെ വരികൾക്ക് എം.ജയചന്ദ്രൻ സംഗീതം പകരുന്നു. യൂണിവേഴ്സൽ സിനിമയുടെ ബാനറിൽ ബി.രാകേഷാണ് ചിത്രം നിർമ്മിക്കുന്നത്.
ക്യാപ്റ്റൻ, വെള്ളം എന്നീ സിനിമകൾക്ക് ശേഷം ജയസൂര്യ പ്രജേഷ് സെൻ ടീമിൽ ഒരുങ്ങുന്ന സിനിമയാണ് മേരി ആവാസ് സുനോ. വെള്ളം ഒരു മാസമായി തിയറ്ററുകളിൽ വിജയകരമായി പ്രദർശിപ്പിക്കുകയാണ്.
ജയസൂര്യയും മഞ്ജുവും ആദ്യമായി ഒന്നിക്കുന്നു;"മേരി ആവാസ് സുനോ'
04:20 PM Feb 14, 2021 | Deepika.com