നവാഗതരായ ഒരുപറ്റം കഥാകാരന്മാര് അണിനിരക്കുന്ന തഥാഗതയുടെ ഫസ്റ്റ് ലുക്ക് പോസ്റ്റര് നടന് നരേനും ഷൈന് ടോം ചാക്കോയും റിലീസ് ചെയതു. കഥകളിയും നൃത്തവും പശ്ചാത്തലമാകുന്ന ഹ്രസ്വചിത്രത്തിന്റെ ഫസ്റ്റ്ലുക്ക് പോസ്റ്റര് തങ്ങളുടെ ഒഫീഷ്യല് പേജിലൂടെയാണ് ഇരുവരും റിലീസ് ചെയതത്. ചിത്രത്തിന്റെ പോസ്റ്ററും പേരും സോഷ്യല് മീഡിയയില് വളരെ ശ്രദ്ധിക്കപ്പെട്ടുകഴിഞ്ഞു.
ഒരു ബയോഫിക്ഷന് ഡ്രാമ മൂവിയായി ഒരുക്കുന്ന ചിത്രം സംവിധാനം ചെയ്യുന്നത് ക്ലാസിക് ഡാന്സറായ ശ്രീജിത്ത് മാരിയലാണ്. പാലക്കാടിന്റെ പശ്ചാത്തലത്തില് തന്റെ ജീവിതത്തില് നടന്ന സംഭവങ്ങള്ക്കു കലാപരമായ ചലച്ചിത്ര ആവിഷ്കാരമൊരുക്കുകയാണ് ശ്രീജിത്ത് തഥാഗതയിലൂടെ. ശ്രീജിത്തിന്റെ കലാജീവിതത്തില് പ്രചോദനം ഉള്ക്കൊണ്ട് ഒരുക്കിയ യഥാഹസ്ത തഥോ മന എന്ന ഡോക്യുമെന്ററിക്കു സിനിമാറ്റിക് ഭാഷ്യമൊരുക്കുകയാണ് തഥാഗതയിലൂടെ.
മിനിസ്ക്രീന് താരങ്ങളായ സൗപര്ണിക സുബാഷ്, ഗൗരി പ്രകാശ്, പ്രിയ മേനോന്, ക്ലാസിക്കല് ഡാന്സറായ ഡോ. രേഖ രൗജു തുടങ്ങിയവരും ഫേസ്ബുക്കില് ചിത്രത്തിനു ആശംസകളുമായെത്തി. കാമറക്കു മുന്നിലും പിന്നിലും നവാഗതരായ നിരവധിപേരെ അണിനിരത്തുന്ന ചിത്രം ശ്രീ കലാക്ഷേത്രയുടെ ബാനറിലാണ് ഒരുക്കുന്നത്.
ശ്രീജിത്ത് മാരിയല് ഒരുക്കിയ യഥാ ഹസ്ത തഥോ മന സൗത്ത് ഇന്ത്യന് സിനിമാ ടെലിവിഷന് അക്കാദമി സംഘടിപ്പിച്ച ഓണ്ലൈന് ഫിലിം ഫെസ്റ്റിവലില് എക്സലന്സ് പുരസ്കാരം നേടിയിരുന്നു.
കഥകളിയുടെ പശ്ചാത്തലത്തിൽ തഥാഗത: ഫസ്റ്റ്ലുക്ക് പോസ്റ്റർ എത്തി
12:14 PM Nov 09, 2020 | Deepika.com