മലയാളത്തിന്റെ അഭിനയ സാമ്രാട്ടുകളായ മോഹൻലാലും തിലകനും ചേർന്ന് അഭിനയിച്ച മിക്ക ചിത്രങ്ങളും മലയാളത്തിലെ സൂപ്പർഹിറ്റുകളാണ്. ഇരുവരും തമ്മിലുള്ള കെമിസ്ട്രി അത്രത്തോളമായിരുന്നു. നിരവധി ചിത്രങ്ങളിൽ ഇരുവരും അച്ഛനും മകനുമായി അഭിനയിച്ചിട്ടുണ്ട് . അതിലൊന്നും തിലകനെയും ലാലിനെയും വെല്ലാൻ വേറൊരു അച്ഛൻ- മകൻ കോംബോ ഉണ്ടായിട്ടില്ലെന്നു പറയേണ്ടി വരും. അത്തരത്തിലുള്ള ഏതാനും ചിത്രങ്ങൾ ഇതാ...
1. കിരീടം
മലയാളത്തിലെ ഏറ്റവും മികച്ച ചിത്രങ്ങളുടെ ലിസ്റ്റ് എടുത്താൽ അതിൽ മുൻപന്തിയിൽ തന്നെയുണ്ടാവും കിരീടം. സേതുമാധവനായി മോഹൻലാലും കോണ്സ്റ്റബിൾ അച്യുതൻനായരായി തിലകനും മത്സരിച്ചഭിനയിച്ച ചിത്രം ഇരുവരുടെയും മികച്ച കഥാപാത്രങ്ങളിലൊന്നു കൂടിയാണ്. സിബി മലയിൽ സംവിധാനം ചെയ്ത ഈ ചിത്രം 250 ദിവസത്തിലധികം തിയേറ്ററുകളിൽ പ്രദർശിപ്പിച്ചിരുന്നു.
2. ചെങ്കോൽ
1989ൽ പുറത്തിറങ്ങിയ സൂപ്പർഹിറ്റ് ചിത്രം കിരീടത്തിന്റെ രണ്ടാംഭാഗം കൂടിയായിരുന്നു ചിത്രത്തിന്റെ കഥ, തിരക്കഥ, സംഭാഷണം എന്നിവയെല്ലാം നിർവഹിച്ചത് ലോഹിതദാസ് ആണ്. സിബി മലയിലിന്റെ സംവിധാനത്തിൽ മോഹൻലാൽ, തിലകൻ, സുരഭി, എന്നിവർ പ്രധാനവേഷങ്ങളിലെത്തിയ ചിത്രമായിരുന്നു ചെങ്കോൽ.
3. പവിത്രം
ടി.കെ. രാജീവ് കുമാറിന്റെ സംവിധാനത്തിൽ മോഹൻലാൽ, തിലകൻ, ശോഭന, വിന്ദുജ മേനോൻ എന്നിവർ പ്രധാനവേഷങ്ങളിലെത്തിയ ചിത്രമായിരുന്നു പവിത്രം. ചിത്രത്തിൽ മോഹൻലാലിന്റെ അച്ഛനായിട്ടായിരുന്നു തിലകൻ അഭിനയിച്ചത്. ചിത്രത്തിലൂടെ 1994ലെ മികച്ച നടനുള്ള ഫിലിം ഫെയർ അവാർഡ് മോഹൻലാലിന് ലഭിച്ചിരുന്നു.
4. സ്ഫടികം
ആടുതോമയെയും ചാക്കോ മാഷിനെയും പോലെ ഒരു പക്ഷേ മലയാളികളുടെ ഹൃദയത്തിൽ ഇത്ര ആഴത്തിൽ പതിഞ്ഞ മറ്റൊരു അച്ഛൻ-മകൻ കോംബോ ഇല്ലെന്നു തന്നെ പറയേണ്ടി വരും. ഭദ്രന്റെ മാസ്റ്റർ പീസ് എന്നു തന്നെ പറയാവുന്ന സ്ഫടികം മലയാളികൾക്ക് സമ്മാനിച്ചത് അന്നുവരെ കാണാത്ത മോഹൻലാലിനെയും തിലകനെയുമായിരുന്നു. ആടുതോമയായി മോഹൻലാലും ചാക്കോ മാഷായി തിലകനും മത്സരിച്ചഭിനയച്ചപ്പോൾ പ്രേക്ഷകർക്ക് ലഭിച്ചത് എക്കാലത്തെയും മികച്ച ക്ലാസിക് ചിത്രങ്ങളിലൊന്നുകൂടിയായിരുന്നു.
5. നരസിംഹം
മലയാളത്തിലെ എക്കാലത്തെയും വലിയ ഹിറ്റ് ചിത്രങ്ങളിലൊന്നാണ് മോഹൻലാൽ നായകനായി എത്തിയ നരസിംഹം. കളക്ഷൻ റെക്കോർഡുകൾ തിരുത്തിക്കുറിച്ച ചിത്രം 250 ദിവസത്തിലധികം തിയറ്ററുകളിൽ പ്രദർശിപ്പിച്ചിരുന്നു. ഷാജി കൈലാസ് ഒരുക്കിയ ഈ ചിത്രത്തിലും മോഹൻലാലിന്റെ അച്ഛനായിട്ടായിരുന്നു തിലകൻ അഭിനയിച്ചത്.
6. ഇവിടം സ്വർഗമാണ്
മോഹൻലാലിനെ പ്രധാന കഥാപാത്രമാക്കി റോഷൻ ആൻഡ്രൂസ് സംവിധാനം ചെയ്ത ചിത്രമായിരുന്നു ഇവിടം സ്വർഗമാണ്. ജെയിംസ് ആൽബർട്ട് ആണ് ചിത്രത്തിന്റെ കഥയും തിരക്കഥയും നിർവഹിച്ചിരിക്കുന്നത്. തികച്ചും റിയലിസ്റ്റിക്കായ പശ്ചാത്തലത്തിൽ ഒരുക്കിയ ചിത്രത്തിൽ തിലകൻ, ലാലു അലക്സ്, ജഗതി ശ്രീകുമാർ, ശ്രീനിവാസൻ എന്നിവരായിരുന്നു മറ്റു പ്രധാന കഥാപാത്രങ്ങളെ അവതരിപ്പിച്ചത്.
7. മിന്നാരം
മോഹൻലാൽ, ശോഭന, തിലകൻ എന്നിവരെ പ്രധാന കഥാപാത്രങ്ങളാക്കി പ്രിയദർശൻ സംവിധാനം ചെയ്ത ചിത്രമാണ് മിന്നാരം. 1994ൽ പുറത്തിറങ്ങിയ ചിത്രം ആ വർഷത്തെ സൂപ്പർഹിറ്റു ചിത്രങ്ങളിലൊന്നു കൂടിയാണ്. ചിത്രത്തിലെ ഗാനങ്ങളും ഏറെ ശ്രദ്ധിക്കപ്പെട്ടിരുന്നു. ഈ ചിത്രത്തിലും മോഹൻലാലിന്റെ അച്ഛനായിട്ടായിരുന്നു തിലകൻ അഭിനയിച്ചത്.
അഭിനയ പ്രതിഭകൾ ഒരുമിച്ചപ്പോൾ...
07:56 PM Aug 29, 2020 | Deepika.com