സംഗീത് ശിവന്റെ സംവിധാനത്തിൽ മലയാളത്തിന്റെ താരരാജാവ് മോഹൻലാൽ നായകനായി 1993 -ൽ ഇറങ്ങിയ ചിത്രമാണ് ഗാന്ധർവം. ഡെന്നിസ് ജോസഫ് തിരക്കഥ എഴുതിയ ചിത്രം വൻ വിജയം നേടിയിരുന്നു. സിനിമയ്ക്കൊപ്പം അതിലെ ഗാനങ്ങളും ഏറെ ശ്രദ്ധിക്കപ്പെട്ടിരുന്നു.
ബോളിവുഡ് നടിയും മോഡലുമായ കാഞ്ചനായിരുന്നു മോഹൻലാലിന്റെ നായികയായി ഈ സിനിമയിൽ എത്തിയത്. തെലുങ്ക്, ഹിന്ദി ചിത്രങ്ങളിൽ തിളങ്ങി നിന്ന താരത്തിന്റെ ആദ്യ മലയാള ചിത്രം കൂടിയായിരുന്നു ഗാന്ധർവം.
പിന്നീട് വിവിധ ഭാഷകളിൽ സജീവമായ താരം വിവാഹത്തോടെ സിനിമാ ജീവിതം അവസാനിപ്പിച്ചു. മോഹൻലാലിനെപ്പറ്റിയും ഗാന്ധർവം സിനിമയെപ്പറ്റിയും അടുത്തയിടെ നൽകിയ ഒരു അഭിമുഖത്തിൽ കാഞ്ചൻ മനസ് തുറന്നതു വലിയ വാർത്താപ്രാധാന്യം നേടിയിരിക്കുകയാണ്.
തന്റെ അഭിനയ ജീവിതത്തിലെ വേറിട്ടൊരു അനുഭവമാണ് ലാലേട്ടന്റെ ഒപ്പം ഗാന്ധർവം സിനിമയിൽ അഭിനയിച്ചപ്പോൾ ഉണ്ടായതെന്നും താരം പറയുന്നു. മറ്റ് ഇൻഡസ്ട്രികളിൽ ഇത്രയും സ്വാതന്ത്ര്യം ലഭിച്ചിട്ടില്ലെന്നും താരം പറയുന്നു.
ആദ്യമായി മലയാളം സിനിമയിൽ അഭിനയിക്കുന്പോൾ നല്ല ടെൻഷനുണ്ടായിരുന്നു. എന്നാൽ ഷൂട്ടിംഗ് പുരോഗമിച്ചപ്പോൾ സെറ്റിൽ ഉള്ളവരുമായി സൗഹൃദം സ്ഥാപിക്കാൻ കഴിഞ്ഞു. മോഹൻലാൽ ഇത്രയും വലിയ നടനാണ് എന്ന് അതിൽ അഭിനയിക്കുന്ന സമയത്ത് അറിഞ്ഞിരുന്നില്ല. ഒപ്പം അഭിനയിച്ചപ്പോൾ ഒരിക്കൽ പോലും മോശമായോ മുഖം കറുപ്പിച്ചോ അദ്ദേഹം സംസാരിച്ചിട്ടില്ലെന്നും താരം പറയുന്നു.
ഗാന്ധർവം സിനിമയിൽ അഭിനയത്തിന്റെ ഇടയ്ക്ക് ഉണ്ടായ ഒരു രംഗം ഓർക്കുന്പോൾ ഇപ്പോളും ചിരി വരാറുണ്ടെന്നും കാഞ്ചൻ പറഞ്ഞു. ഒരു കീ ഒളിപ്പിക്കുന്ന രംഗത്തിൽ അത് തന്റെ ഡ്രസ്സിന്റെ അകത്ത് എടുത്ത് ഇടുകയും തുടർന്ന് മോഹൻലാൽ വന്ന് എന്നെ എടുത്തുപൊക്കി തലകീഴായി പിടിച്ച് കുലുക്കി കീ വെളിയിൽ ഇടുന്നതാണ് രംഗം.
എന്നാൽ ആ രംഗം രണ്ട് തവണ എടുത്തപ്പോളും മോഹൻലാൽ തന്നെ എത്ര പിടിച്ചു കുലുക്കിയിട്ടും കീ വെളിയിൽ വന്നില്ല. പിന്നീട് കീ വീഴുന്ന ഷോട്ട് മാത്രമായി ഷൂട്ട് ചെയ്യുകയായിരുന്നു. ഡ്രസ്സിനകത്തുനിന്ന് കീ എടുത്ത് കൈ കൊണ്ട് താഴെ ഇടുന്ന ഷോട്ട് ആണ് പിന്നീട് ചെയ്തതതെന്നും താരം വ്യക്തമാക്കുന്നു.
ഗാന്ധർവത്തിലെ കുലുക്കിയിട്ടും വീഴാത്ത കീ
07:56 PM Jul 17, 2020 | Deepika.com