കോവിഡ് ഭീതിയിൽ സ്തംഭിച്ച മലയാള സിനിമയ്ക്ക് പുതുജീവൻ നല്കി സിനിമാചിത്രീകരണം പുനരാരംഭിച്ചു. ലാലും മകൻ ലാൽ ജൂനിയറും ചേർന്ന് സംവിധാനം നിർവഹിക്കുന്ന സുനാമിയുടെ ചിത്രീകരണം എറണാകുളം കച്ചേരിപ്പടിയിലാണ് പുനരാരംഭിച്ചത്. സർക്കാർ നിർദ്ദേശിച്ച എല്ലാ മാനദണ്ഡങ്ങളോടും കൂടി ചിത്രീകരണം ആരംഭിക്കുന്ന ആദ്യ മലയാള ചിത്രവും സുനാമി തന്നെയാണ്. സിനിമയുടെ 14 ദിവസത്തെ ചിത്രീകരണമാണ് അവശേഷിക്കുന്നത്.
സർക്കാർ മാനദണ്ഡം അനുസരിച്ച് 50 പേർ മാത്രമാണ് ചിത്രീകരണത്തിൽ പങ്കെടുക്കുന്നത്. തെർമൽ സ്കാനർ, മാസ്കുകൾ, സാനിറ്റൈസർ എന്നിവയും ലൊക്കേഷനിൽ എത്തിച്ചിട്ടുണ്ട്.
ലാൽ തിരക്കഥ ഒരുക്കുന്ന ചിത്രത്തിൽ ബാലു വർഗീസാണ് നായകൻ. കൂടാതെ ഇന്നസെന്റ്, മുകേഷ്, അജു വർഗീസ്, സുരേഷ് കൃഷ്ണ എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.
പാണ്ട ഡാഡ് പ്രൊഡക്ഷൻസിന്റെ ബാനറിൽ ലാലിന്റെ മരുമകൻ അലൻ ആന്റണിയാണ് ചിത്രം നിർമിക്കുന്നത്.