തനിക്കെതിരേ സോഷ്യൽ മീഡിയയിലൂടെ നടക്കുന്ന അപവാദ പ്രചരണത്തിനെതിരേ രൂക്ഷമായ ഭാഷയിൽ പ്രതികരിച്ച് താര കല്യാണ്. സോഷ്യൽ മീഡിയയിൽ കൂടിത്തന്നെയാണ് താരത്തിന്റെ പ്രതികരണം.
മകളുടെ വിവാഹത്തിനിടയിൽ പകർത്തിയ വിഡിയോയുടെ ഒരു രംഗം ചിത്രമാക്കി മോശപ്പെട്ട രീതിയിൽ പ്രചരിപ്പിക്കുകയാണ്. ഇതു ചെയ്തവരെ വെറുക്കുന്നതായും ഒരു കാലത്തും അവരോടു പൊറുക്കില്ലെന്നും പൊട്ടിക്കരഞ്ഞുകൊണ്ട് താര വീഡിയോയിലൂടെ പറയുന്നു.
താരയുടെ വാക്കുകൾ ഇങ്ങനെ... സമൂഹമാധ്യമങ്ങളിൽ എന്നെ കുറിച്ചുള്ള ഒരു ഫോട്ടോ വൈറലാകുന്നുണ്ട്. എന്റെ മകളുടെ കല്യാണം ഒറ്റയ്ക്ക് നടത്താനുള്ള ധൈര്യമില്ലാഞ്ഞിട്ടാണ് ഭഗവാനെ കൂട്ടുപിടിച്ച്, ഗുരുവായൂരപ്പന്റെ കൈപിടിച്ച് നടത്തിയത്.
ആ വിവാഹത്തിനിടയിലെ ഒരു വിഡിയോ ക്ലിപ്പിന്റെ ഭാഗമൊടുത്ത് ചിത്രമാക്കി വൈറലാക്കിയിരിക്കുന്നു. അത് വൈറലാക്കിയ മഹാനോട് ചോദിക്കട്ടെ, നിന്റെയൊക്കെ മനസ് കല്ലാണോ? നിനക്കുമില്ലേ വീട്ടിൽ അമ്മയൊക്കെ. ഈ ജന്മം ഞാനെന്ന വ്യക്തി ഒരിക്കലും നിന്നോട് പൊറുക്കില്ല. നിന്റെ അമ്മയ്ക്ക് എന്റെ ഗതികേട് വരാതിരിക്കട്ടെ. സമൂഹമാധ്യമങ്ങൾ നല്ലതാണ്. പക്ഷേ, ഇങ്ങനെ നിങ്ങൾ ആരോടും ചെയ്യരുത്. അത് പലരുടെയും ഹൃദയംഭേദിക്കും.
എന്റെ ആത്മാവിനെ നിങ്ങൾ വേദനിപ്പിച്ചു. ഇത് പോസ്റ്റ് ചെയ്ത ആളിനോട്, പ്രചരിപ്പിച്ചവരോട്, കമന്റ് ചെയ്ത് ആഘോഷിച്ചവരോട്: നിങ്ങളെ ഞാൻ വെറുക്കുന്നു. ഒരു സ്ത്രീയാണ് എന്നെങ്കിലും ഇതു ചെയ്യുന്നവർ പരിഗണിക്കണം.
പൊട്ടിത്തെറിച്ചും പൊട്ടിക്കരഞ്ഞും താരാ കല്യാണ്
12:30 PM Mar 06, 2020 | Deepika.com