കൂടത്തായി കൊലപാതക പരമ്പരക്കേസിനെ ഇതിവൃത്തമാക്കി നിര്മിക്കുന്ന സിനിമകളുടെയും സീരിയലുകളുടെയും നിര്മാതാക്കള്ക്ക് താമരശേരി മുന്സിഫ് കോടതി നോട്ടിസ് അയച്ചു. കൂടത്തായി കേസിലെ മുഖ്യപ്രതിയായ ജോളി ജോസഫ്, മക്കളായ റെമോ റോയ്, റെനോള്ഡ് റോയ് എന്നിവര് അഡ്വക്കറ്റ് മുഹമ്മദ് ഫിര്ദൗസ് മുഖേന നല്കിയ ഹര്ജിയിലാണ് കോടതിയുടെ ഇടപെടല്.
13ന് ആന്റണി പെരുമ്പാവൂർ, സീരിയൽ സംപ്രേക്ഷണം ചെയ്യു ന്ന ചാനലിന്റെ മേധാവി തുടങ്ങിയവർ കോടതിയിൽ ഹാജരാകണം. ഇതനുസരിച്ച് ആശീര്വാദ് സിനിമാസ് ഉടമ ആന്റണി പെരുമ്പാവൂര്, വാമോസ് പ്രൊഡക്ഷന്സ് ഉടമ ഡിനി ഡാനിയല്, പ്രമുഖ ചാനൽ തുടങ്ങിയ കക്ഷികള്ക്ക് കോടതി നോട്ടീസ് അയച്ചു.
പരേതനായ റോയ് തോമസിന്റെയും ജോളി ജോസഫിന്റെയും മക്കളായ റെമോ റോയ്, റെനോള്ഡ് റോയ് , റോയ് തോമസിന്റെ സഹോദരി രെന്ജി വില്സണ് എന്നിവര് നല്കിയ ഹരജി പരിഗണിച്ചാണ് കോടതിയുടെ നീക്കം. ഇതുപ്രകാരം പ്രമാദമായ കൂടത്തായി കൊലപാതക പരമ്പരകളെ ആസ്പദമാക്കി ഒരുങ്ങുന്ന സിനിമകളുടെയും, സീരിയലുകളുടെയും നിര്മ്മാതാക്കള്ക്ക് നോട്ടീസ് അയക്കുകയാണെന്ന് താമരശേരി മുന്സിഫ് കോടതി അറിയിച്ചു.
മോഹന്ലാലിനെ അന്വേഷണ ഉദ്യോഗസ്ഥനാക്കി ആശീര്വാദ് സിനിമാസിന്റെ ഉടമ ആന്റണി പെരുമ്പാവൂര് കൂടത്തായി എന്ന പേരില് സിനിമ ഒരുക്കുമെന്ന് പ്രഖ്യാപിച്ചിരുന്നു. കൂടാതെ ചലച്ചിത്ര നടിയും വാമോസ് മീഡിയ ഉടമകളിലൊരാളുമായ ഡിനി ഡാനിയേല് ജോളി എന്ന പേരില് ഇതേ ഇതിവൃത്തത്തില് സിനിമയുടെ പ്രൊഡക്ഷന് ആരംഭിച്ചിരുന്നു. ഒപ്പം മലാളത്തിലെ പ്രമുഖ ചാനൽ കൂടത്തായി എന്ന പരമ്പര അടുത്ത തിങ്കളാഴ്ച ആദ്യ എപ്പിസോഡ് സംപ്രേഷണം ചെയ്യാനിരിക്കുകയാണ്.
13ന് ആന്റണി പെരുമ്പാവൂർ അടക്കമുള്ള നിർമാതാക്കൾ കോടതിയിൽ ഹാജരാകണമെന്ന് കോടതി അറിയിച്ചതായി വാദി ഭാഗത്തിന് വേണ്ടി ഹാജരായ അഡ്വ. എം. മുഹമ്മദ് ഫിര്ദൗസ് പറഞ്ഞു. അന്വേഷണം അന്തിമഘട്ടത്തിലെത്തി നില്ക്കും മുന്പേ തന്നെ കേരളത്തെ ഞെട്ടിച്ച ഈ കേസിനെ ഇതിവൃത്തമാക്കി സിനിമയും സീരിയലും പ്രഖ്യാപിക്കപ്പെടുകയായിരുന്നു.
ഇതിനകം തന്നെ മുഖ്യ പ്രതി ജോളിയുടെ മക്കളും വിദ്യാര്ഥികളുമായ റെമോ റോയ്, റെനോള്ഡ് റോയ് എന്നിവര് വലിയ മാനസിക സംഘര്ഷത്തിലൂടെ കടന്നുപോവുകയാണെന്നും, ഇതേ സംഭവത്തെ ഇതിവൃത്തമാക്കി എരിവും പുളിയും ചേര്ത്ത തിരക്കഥകളുമായി സിനിമകളും, സീരിയല് പരമ്പരകളും വരുമ്പോള് അത് ഇവരെ കൂടുതല് ഒറ്റപ്പെടുത്തുന്നതും മാനസിക ഭാവി തന്നെ തകര്ക്കുന്നതുമാകുമെന്ന് ചൂണ്ടിക്കാട്ടിയാണ് ഹർജി സമര്പ്പിക്കപ്പെട്ടത്. ഈ ഹർജിയിലാണിപ്പോള് കോടതി ഹർജിക്കാര്ക്ക് അനുകൂലമായി സിനിമകളുടെയും സിരിലുകളുടെയും നിര്മാതാക്കള്ക്ക് നോട്ടീസ് അയച്ചിരിക്കുന്നത്.
കൂടത്തായി ഇതിവൃത്തമായി സിനിമയും സീരിയലും; കോടതി നോട്ടീസ് അയച്ചു
02:52 PM Jan 10, 2020 | Deepika.com