അടിമാലി: സ്റ്റുഡന്റ് പോലീസ് കേഡറ്റ് ജില്ലാ സമ്മർ ക്യാംപിന് അടിമാലിയിൽ വർണാഭമായ തുടക്കം. വിശ്വദീപ്തി സിഎംഐ പബ്ലിക് സ്കൂളിൽ നടക്കുന്ന ക്യാംപിന് തുടക്കംകുറിച്ച് ജില്ലാ പോലീസ് മേധാവി കെ.ബി. വേണുഗോപാൽ പതാക ഉയർത്തി. സമ്മേളനം ജില്ലാ പോലീസ് മേധാവി ഉദ്ഘാടനം ചെയ്തു. എസ്പിസി നോഡൽ ഓഫിസർ എ.ഡി. മോഹൻദാസ്, അസി. നോഡൽ ഓഫിസർ എസ്.ആർ. സുരേഷ് ബാബു, അസി.കമൻഡാന്റ് കൃഷ്ണൻകുട്ടി, അടിമാലി സിഐ യൂനസ്, റെജി നളന്ദ തുടങ്ങിയവർ പങ്കെടുത്തു. ജില്ലയുടെ വിവിധ ഭാഗങ്ങളിൽനിന്നായി 600-ഓളം കേഡറ്റുകൾ ക്യാംപിൽ പങ്കെടുക്കുന്നുണ്ട്. ദിവസവും കളരി, യോഗ, പരേഡ് പരിശീലനം, ഇൻഡോർ ക്ലാസുകൾ, കലാപരിപാടികൾ തുടങ്ങിയവ നടക്കും.