കൂത്താട്ടുകുളം: പുതുവേലിയിൽ വിദ്യാർഥികളുമായി പോയ ജീപ്പ് മണ്തിട്ടയിലിടിച്ചുണ്ടായ അപകടത്തിൽ മരിച്ചവരുടെ വീടുകൾ മുൻ മുഖ്യമന്ത്രി ഉമ്മൻചാണ്ടി സന്ദർശിച്ചു. മേരിഗിരി സിഎംഐ പബ്ലിക് സ്കൂളിലെ യുകെജി വിദ്യാർഥികളായ ആൻമരിയ ഷിജി, നയന ദിലീപ്, ജീപ്പ് ഡ്രൈവർ ചക്കാലപ്പാറ തെക്കെപള്ളിക്കാപറന്പിൽ (കുടിലിൽ) ജോസ് ജേക്കബ് (സിബി)എന്നിവരുടെ വീടുകളിലാണ് ഇന്നലെ ഉച്ചയോടെ ഉമ്മൻചാണ്ടി എത്തിയത്. നിയമസഭാ ബജറ്റ് അവതരണമായതിനാലാണ് അപകട ദിവസം എത്താൻ കഴിയാത്തതെന്നു അദ്ദേഹം പറഞ്ഞു. കൂത്താട്ടുകുളം നഗരസഭാ ചെയർമാൻ പ്രിൻസ് പോൾ ജോണ്, കെപിസിസി സെക്രട്ടറി ജെയ്സണ് ജോസഫ്, ടോമി കെ. തോമസ്, കെ.ജി. ഷിബു, ബിജു ജോസഫ് തുടങ്ങിയവരും ഉമ്മൻചാണ്ടിക്കൊപ്പമുണ്ടായിരുന്നു.