മുതലക്കോടം: ദീപിക ഫ്രണ്ട്സ് ക്ലബ് കോതമംഗലം രൂപത കമ്മിറ്റിയും ഹോളിഫാമിലി ആശുപത്രിയും അമേരിക്കയിലെ സർക്കിൾ വോളന്‍റിയേഴ്സ് ഇന്‍റർനാഷണൽ സംഘടനയും സംയുക്തമായി മുതലക്കോടം ആശുപത്രിയിൽ സൗജന്യ വിദഗ്ധ ശസ്ത്രക്രിയ ക്യാന്പ് നടത്തും. ജൂണ്‍ 30 മുതൽ ജൂലൈ ഏഴു വരെ നടത്തുന്ന ക്യാന്പിനു വിപുലമായ കമ്മിറ്റി രൂപീകരിച്ച് പ്രവർത്തനം ആരംഭിച്ചു. പ്രോസ്റ്റേറ്റ്, മൂത്രാശയ കല്ല്, ഹെർണിയ, മുച്ചുണ്ട്, ഉൾനാക്ക്, യൂട്രസ് നീക്കം ചെയ്യൽ, തിമിരം തുടങ്ങിയ രോഗങ്ങൾക്കുള്ള ശസ്ത്രക്രിയകളാണ് നടത്തുന്നത്. സാന്പത്തിക ബുദ്ധിമുട്ടുള്ളവർക്ക് ശസ്ത്രക്രിയ ചെയ്യാൻ സഹായമൊരുക്കുകയാണ് ക്യാന്പിന്‍റെ ലക്ഷ്യം. ജാതിമത വ്യത്യാസമില്ലാതെ നിർധനരായ രോഗികൾക്ക് ഏപ്രിൽ 10 വരെ പേര് രജിസ്റ്റർ ചെയ്യാം. അപേക്ഷ നൽകുന്നവർ ഫോട്ടോ, റേഷൻ കാർഡ്, ആധാർ കാർഡ്, ചികിത്സിക്കുന്ന ഡോക്ടറുടെ സർട്ടിഫിക്കറ്റ് എന്നിവ ഹാജരാക്കണം. ഓരോ വിഭാഗത്തിലും ആദ്യം രജിസ്റ്റർ ചെയ്യുന്ന അർഹരായ അന്പതു പേർക്ക് ആനുകൂല്യം ലഭിക്കും. രക്ഷാധികാരിയായി മുതലക്കോടം ഫൊറോന പള്ളി വികാരി ഫാ. ജോസഫ് അടപ്പൂര്, കോ-ഓർഡിനേറ്റർമാരായി-ഡിഎഫ്സി രൂപത ഡയറക്ടർ ഫാ. ജിനോ പുന്നമറ്റത്തിൽ, ആശുപത്രി അഡ്മിനിസ്ട്രേറ്റർ സിസ്റ്റർ ജോണ്സി മരിയ, ജനറൽ കണ്‍വീനർമാരായി-ഡിഎഫ്സി രൂപത പ്രസിഡന്‍റ് ജിബോയിച്ചൻ വടക്കൻ, ട്രഷറർ ടോം ജെ. കല്ലറയ്ക്കൽ, നഴ്സിംഗ് സൂപ്രണ്ട് സിസ്റ്റർ മേരി ആലപ്പാട്ട്, കോ-ഓർഡിനേറ്റർമാരായി രൂപത സെക്രട്ടറി തോമസ് കുണിഞ്ഞി, വൈസ് പ്രസിഡന്‍റ് ജയിംസ് പള്ളിക്കമ്യാലിൽ, ഷെയർഹോൾഡർ പ്രതിനിധി ജോയി നടുക്കുടി എന്നിവരടങ്ങുന്ന കമ്മിറ്റി രൂപീകരിച്ചു. വിവരങ്ങൾക്ക്-ഫോണ്: 9447105644, 9446826332.
