മലയാള സിനിമാ പ്രേക്ഷകർക്കു മുന്നിൽ വിസ്മയക്കാഴ്ചയൊരുക്കാൻ പുതിയൊരു ചിത്രം അണിയറയിൽ ഒരുങ്ങുന്നു. സിധിൽ സുബ്രഹ്മണ്യൻ എഴുതി സംവിധാനം ചെയ്യുന്ന ബാക് ടു ലൈഫ് എന്ന ചിത്രം അവസാനഘട്ടത്തിലാണ്. ചിത്രീകരണം പൂർത്തിയായ സിനിമയുടെ വിഎഫ്എക്സ് ജോലികളാണ് പൂർത്തിയാകാനുള്ളത്. ചിത്രത്തിന്റെ 80 ശതമാനത്തോളം വിഎഫ്എക്സ് പിന്തുണയോടെയാണ് ഒരുക്കുന്നത്. അതിജീവനത്തിന്റെ കഥപറയുന്ന ഒരു ഫിക്ഷൻ ത്രില്ലറായാണ് ചിത്രം ഒരുക്കുന്നത്.
101 ചോദ്യങ്ങൾ എന്ന സിനിമയിലെ അഭിനയത്തിന് ദേശീയ അവാർഡ് നേടിയ മാസ്റ്റർ മിനോണ് ആണ് കേന്ദ്രകഥാപാത്രത്തെ അവതരിപ്പിക്കുന്നത്. രണ്ടു ഗെറ്റപ്പുകളിലാണ് മിനോണ് എത്തുന്നത്. ഒരു മെക്സിക്കൻ അപാരത എന്ന ചിത്രത്തിന്റെ സംവിധായകൻ ടോം ഇമ്മട്ടിയും ഒരു പ്രധാന വേഷത്തിലെത്തുന്നുണ്ട്. മുഹമ്മദ് അലി സംഗീതവും മണികണ്ഠൻ അയ്യപ്പ പശ്ചാത്തലസംഗീതവുമൊരുക്കുന്നു.
പ്രകാശ് വേലായുധനാണ് ഛായാഗ്രഹണം. ഇൻഫോ പ്രിസം, റാം എന്റർടെയ്ൻമെന്റ് എന്നിവരുടെ സഹകരണത്തോടെ ടീം മീഡിയ പ്രൊഡക്ഷനാണ് ചിത്രം നിർമിക്കുന്നത്.
വിസ്മയമാകാൻ ബാക് ടു ലൈഫ് ഒരുങ്ങുന്നു
12:21 PM Jul 26, 2017 | Deepika.com